Kralendijk – Entidat Públiko Boneiru ta premirá desaroyonan positivo pa nos ekonomia. Esaki despues di kòmbersashonnan intensivo ku Ministerio di Salubridat Públiko, Bienestar i Deporte (VWS), ku e resultado ku Boneiru a bai kódigo hel bèk despues di kasi 5 luna.

A tuma  e desishon aki pasobra ta parse ku awor akí Boneiru tin e kasonan di corona bou di kontròl. Por mira un bahada signifikante den e kasonan aktivo. Un otro faktor positivo ta ku Boneiru ta un di e islanan den region ku un porsentahe haltu di persona ku a pasa nan promé angua kontra corona; Ya kaba 71,5% di nos habitantenan di 18 aña bai ariba a pasa e promé angua i 38% ya kaba a pasa nan di dos angua kontra corona.

E esfuersonan di Entidat Públiko Boneiru durante e último lunanan den vários kòmbersashon ku Ministerio di Salubridat Públiko, Bienestar i Deporte (VWS) a duna algun resultado positivo siman pasá. Kompanianan di aviashon merikano no kier a kuminsá ku buelo pa Boneiru, pasobra e maneho pa por drenta nos isla konforme e areglo ministerial tabata muchu kompliká i nan sistema di salubridat públiko no por a garantisá ku biaheronan por a disponé di e resultado di un tèst di NAAT/PCR òf e tèst antígeno promé ku salida di nan buelo. Durante un debate di Tweede Kamer dia 28 di aprel ikomo resultado di kòmbersashonnan intensivo ku Ministerio di Salubridat Públiko, Bienestar i Deporte, a entregá un amienda pa hasi posibel ku por hasi e tèst antígeno na yegada tambe. Un mayoria den Tweede Kamer a sostené e amienda. E  ekspektativa ta ku pa mas tardá 1 di yüni esaki por bini na vigor. 

E desishon aki lo trese desaroyonan sumamente positivo pa sektor di turismo i pa e motibu aki pa nos ekonomia en general i pa empleo. For di yüni kompanianan di aviashon merikano por kuminsá ku buelo pa Boneiru atrobe. Tantu Delta Air Lines komo American Airlines entretantu a anunsiá ku for di 5 di yüni nan ta kuminsá bula pa Boneiru atrobe.

Pero tin mas bon notisia: dia 11 di mei último e ministernan di Salubridat Públiko, Bienestar i Deporte, di Hustisia i Siguridat i di Asuntunan Interno i Relashonnan den Reino a laga e státùs di Boneiru komo área di riesgo haltu kaduká i entretantu e kódigo hel ta konta pa Boneiru. Pa e motibu aki ta spera un oumento di biaheronan ku ta bini ku KLM òf TUI for di Oropa. Durante kódigo oraño, ku dia 15 di desèmber Hulanda a anunsiá pa deskurashá biahamentu en general, aerolinianan i agensianan di biahe no por ofresé pakete di biahe. Banda di esei pasaheronan no por a sera un seguro di biahe ku ta kubri Covid. Konsekuensia di esaki tabata ku e kantidat di biahero for di Oropa ku tabata yega nos isla a baha konsiderablemente. Biaheronan ku for di 19 di mei ta bula bèk pa Hulanda no tin mester di laga hasi un tèst di NAAT/PCR i/òf tèst antígeno mas. E konseho di karentena tambe ta vense pa nan i esaki ta hasi ku ta hopi mas atraktivo i kumbiniente pa bula pa Boneiru ku fakansi. Por lo pronto Boneiru ta eksigí sí un resultado negativo di e tèst di NAAT/PCR i/òf tèst antígeno di pasaheronan na yegada na nos isla ora nan ta bini for di un área di riesgo haltu, manera Hulanda i Merka. Entretantu tin kòmbersashonnan ta tuma lugá pa den futuro serkano hasi eksepshon pa hendenan ku ta kompletamente bakuná.

“Di parti di Tourism Corporation Bonaire (TCB) nos ta sumamente kontentu ku e notisia di kódigo hel. TCB por sigui pusha mas awor ku kampañanan di merkadeo no solamente pa e merkado Oropeo pero tambe pa e merkado Merikano. Ya pa luna di mei i yüni TCB lo risibí diferente prensa di afó ku lo bishitá Boneiru i ku lo sòru pa mas eksposishon di nos isla”, segun Marjolein Oleana – Business Manager TCB.

E sektor di turismo, ku gobièrnu di Boneiru durante henter e periodo di Covid ta tene kontakto intensivo kuné, ta sumamente entusiasmá tokante e perspektiva pa despues di mas ku 15 luna por bolbe risibí turista merikano atrobe.

---

Lesa tambe:

• 
  Fundashon Across The Isles ta bai kordiná  aktividat rondo di  historia di sklabitut na Boneiru
• 
  Tayer skibi buki pa mucha tokante herensia kultural, tabata un gran éksito
• 
  Fondo Nasional di Restorashon ta duna un fiansa pa restorashon di The Old Gin House na Sint-Eustatius
• 
  Kampaña nobo ‘You’ve got the power’ a ranka sali na Boneiru
• 
  Thuersten Winklaar ta bringa pa e título di Kampion Hulandes na Den Haag