KRALENDIJK/ORANJESTAD- Referiendo na un artíkulo ku a keda publiká riba e wèpsait dossierkoninkrijksrelaties.nl ku direktiva di PCN a keda akusá di no aktua di buena fe den un kaso di petishon pa finansiamentu na St. Eustatius, PCN ta konfirmá eksistensia di e keho aki. 

E keho ta regardá un desishon pa nenga petishon pa un fiansa, tumá pa Participatiemaatschappij Caribisch Nederland (PMCN), ku ta manehá invershonnan lokal di Pensioenfonds Caribisch Nederland (PCN). E keho a wòrdu dirigí na ministerio di asuntunan interior di di Reino (BZK). 

E fail di e kaso mientrastantu a wòrdu mandá pa e Compliance Officer di PCN, pa revisá e manera ku e proseso a kana i a wòrdu finalisá. 

Tuma na serio

Presidente di direktiva di PCN, Harald Linkels, ta bisa ku ta derecho inegabel di kada ken, ku ta sinti su mes inhustamente tratá pa sea e fondo òf PMCN pa manda un keho aden. “Ta nos deber, komo fondo di penshun, pa tuma kada keho na serio i asugurá nos mes si e keho ta fundá òf no”, asina Linkels a trese dilanti.