KRALENDIJK- Ku un kresementu fuerte di e poblashon na Boneiru, e demanda pa bibienda sosial tambe ta oumentando. Stichting Pensioenfonds Caribisch Nederland (PCN), komo un di e kuater miembronan di konsorsio, a prolongá i amplia su apoyo finansiero na Fundashon Cas Boneriano (‘FCB’) e aña akí.

E aktividatnan di konstrukshon di FCB den entre otro e barionan Hato i Nikiboko, lo generá mas di 400 bibienda sosial. Mayoria di esakinan ta destiná pa hür, pero lo tin tambe algun kas propio tambe den nan.

“Banda di e echo ku ta konstruyendo mas kas ku a plania originalmente, lo konstruí konsiderablemente mas rápido tambe”, segun FCB.

Pa e proyektonan di bibienda nobo na Nikiboko i Hato ta hasi mas uso di suministro di energia sostenibel, por ehèmpel instalando entre otro panel solar i bateria. Banda di energia ‘bèrdè’ ta duna relativamente hopi atenshon tambe na vegetashon (landscaping), pa promové plaser di biba i di bida di futuro habitantenan. 

Nobo pa Boneiru ta e echo ku e kayanan den e barionan nobo lo konsistí kompletamente di klenku. Pa por traha mas rápido, FCB lo bai traha ku un kantidat mas amplio di kontratista pa realisá e plannan di bibienda di e fundashon mas rápido posibel. Banda di kumpli ku e deseonan di bibienda di futuro hürdónan, esaki ta stimulá ekonomia lokal mas tantu posibel tambe. Na 2022 a hasi palabrashonnan entre Entidat Públiko

Boneiru i ministerio di Asuntunan Interno i Relashon di Reino pa regulá e merkado di hür na Boneiru i pa mara un supsidio na esaki.

Konsorsio

Na 2019 a anunsiá lantamentu di un konsorsio di 4 finansiadónan hipotekario, entre nan tres di Kòrsou. E konsorsio ta formá pa Vidanova Bank, Vidanova Pensioenfonds, Foundation Pension Fund Isla Curaçao i Stichting Pensioenfonds Caribisch Nederland. Na komienso di e aña akí tur kuater miembro di e konsorsio a prolongá i amplia nan apoyo pa aselerá entrega di bibiendanan sosial na Boneiru.