KRALENDIJK- Partido Demokrátiko Boneriano den un komunikado di prensa riba djaweps ta skibi ku nan a keda asobrá pa lansamentu di un slogan pa parti di Tourism Corporation Bonaire (TCB), stimulando e idea ku trahamentu den sektor turístiko lo ta ‘sexy’. 

Segun PDB ta bisa, nan ta sinti ku esaki no ta kuadra ètòl ku realidat na nos isla. “Tanten ku no ta paga un sueldo di kua hende por biba, tanten ku no ta ofresé transporte públiko na prèis rasonabel òf asta gratis, tanten ku no tin un sistema di penshun pa ora e hende yega edat di penshun, nos no por bisa ku trahamentu den sektor turístiko ta ‘sexy’. 

Akshon konkreto

PDB ta di opinion ku na lugá di bin ku realmente ta bashí, mester bin ku kambionan konkreto, ku ta hasi trahamentu den sektor turístiko realmente atraktivo. Entre otro PDB ta pensa ku, aparte di e faktornan ya menshoná, mester tin mihó opshon pa ahohida pa mucha, tambe pa esnan ku ta traha warda i durante wikent. Banda di esei, según PDB, mester tin mas posibilidat pa studia den e sektor aki, i tambe na nivel mas haltu, por ehèmpel nivel di HBO.