KRALENDIJK – Riba un djadumingu ku dushi solo nos ta topa Charles Pikeur, mihó konosí komo Chal, na Playa. E ta yama su mes e barbero mas bieu di Boneiru. Ku su 55 aña i su pashon pa e fishi, Chal a bira mientrastantu un barbero konosí. Pikeur ta konta ku un sonrisa riba su kara di su biahe di Kòrsou pa Boneiru i su pashon pa e fishi di barbero.

E ta kòrta e último pidanan di kabei ku segun e no a krese bon e anochi promé. E ta peña su kabei i e ta kla pa e entrevista. Pikeur ta un perfekshonista. Ora ku e mester papia ku hende pa konta su storia di bida tambe su aparensia ta piko bèlo. E ta kuminsá. “Mi a nase na Kòrsou, pero mi kurason ta aki na Boneiru,” Pikeur ta bisa ku orguyo. “Mi famia ta dj’aki i awor mi tin 27 aña kaba bibá akinan.”

El a siña e fishi na Kòrsou 

Pikeur a kuminsá su karera komo barbero na Kòrsou, kaminda el a siña e trikinan di e fishi serka Melvin Martina. “Martina tabata e mihó barbero di Kòrsou e tempu ei. E tabatin kuater barberia i einan mi a haña mi eksperensia”, e ta kòrda. Ounke Pikeur tin tambe un diploma di téknika di instalashon, e fishi di barbero tabata semper su vokashon di bèrdat. “Mi tabata gusta e idea pa hasi hende bunita. Esei ta e pashon real di un barbero,” e ta splika.

Den su barberia ku dushi ambiente na e krusada di Kaya Neerlandia i Kaya den Tera, Pikeur ta pela tantu dama komo kabayero. Tòg ta parse ku e barbero no ke enfoká su mes riba peinada di e damanan. “Mi ta hasi spesialmente peinadanan di afro i kabei kòrtiku. Pa kabeinan largu mi ta referí e klientenan pa otro salon,” segun Pikeur.

Ekspandé 

Pikeur tin un barberia chikitu, pero bon ekipá. Bo ta rekonosé su negoshi bon. Tin un kas chikitu koló oraño-kòrá riba un tereno grandi ku un bòrchi ku e nòmber ‘hair barbershop’. Pikeur ke laga kambia e edifisio kaminda e tin años ta traha. Lástimamente e barbero ta enfrentando retonan, manera e molestia burokrátiko ku e servisio di desaroyo urbano. Sinembargo Pikeur ta keda optimista den futuro di su empresa. “Mi tin plannan pa ekspandé i kuminsá un empresa ku diferente servisio akinan. Lástimamente mi ta warda pa hopi aña kaba riba un pèrmit pa ekstendé tereno. Esaki ta drumí riba un seru grandi di petishon. Mi ta spera di haña un kontesta pronto,” e ta konta.

E peñá perfecto 

Pikeur ta orguyoso di su servisionan pagabel i su reputashon komo spesialista. “Mi ta e barbero mas barata na Boneiru,” e ta bisa ku un kinipí di wowo. “Mi ke keda spesialmente fleksibel i keda yuda hende.”

Ku su eksperensia di añanan largu i su dedikashon Pikeur ta spera di por sigui ku su trabou pa hopi aña mas. “Mi no ke traha asina duru mas manera antes, pero mi ta keda tene semper e pashon pa e trabou,” e ta konkluí. “Mi meta grandi ta pa yuda hendenan riba e isla aki pa tin un peñá perfekto.”