KRALENDIJK – Algun aña pasá a pone asina yamá lokvlotten = reda rònt Boneiru. Ku e redanan aki tin chèns mas grandi pa kue piská. Un bunita rekurso. Sinembargo presidente di Piskabon Ernest de Lanoy no ta satisfecho ku e manera ku kosnan ta kana resientemente awor ku ta uza esakinan. E ta mira problemanan inakseptabel ku uzo di e redanan aki entre e piskado lokal i e charternan di peska komersial. Problemanan ku segun e presidente di Bonaire Fishing Charter Association no ta kuadra. 

,,Ta ònbeskòp i inakseptabel”, segun Ernest de Lanoy, kende algun tempu pasá a bin bèk riba e problema ku e Fish Aggregating Device (FAD’s). Ku otro palabra un tipo di reda ku a instalá na diferente sitio den oséano rònt Boneiru. E FAD’s ta pèrkurá ku tin yen di tipo di piská grandi ta landa den besindario, di moda ku ta mas fásil pa e piskadónan pa yag. “Nos a haña un situashon ku algun charter Hulandes na Boneiru ku mi ta desapuntá den dje. Tin di nan ta paga Piskabon pa por piska serka e FAD’s. Pero hopi di nan ta nenga tambe di paga pa piska akinan, mi ta haña esei un bagamunderia”.

Mundialmente tin piskamentu eksagerá. Den kombinashon ku kambio di klima esei ta pèrkurá ku ta bira mas i mas difísil pa piskadónan pa haña nan botin di kada dia. E FAD’s ta pèrkurá ku piskadónan lokal tin un bon chèns tòg pa keda sobrebibí. Den e redanan nan ta haña en general mas piská i piská mas grandi tambe.

E charternan di peska ta sali mayoria biaha mainta ku un grupo di turista ku ta paga pa por piska. Den awanan di Boneiru bo tin chèns pa piska barakuda, piská di bela, buní òf marlin. Un eksperensia ku pa sierto turista ta inolvidabel. Ku ayudo di e FAD’s e chèns ta mas grandi pa e piskadónan pa mustra nan wéspetnan e piskánan tambe. “E Fad’s tabata pon’é pa piskadónan lokal. Ku esaki mi kier men: ‘Bo ta biba aki, bo ta kontribuí ku tur rekisito di e isla i bo ofishi ta piskadó’. Si bo ta bai piska ku turista riba un boto di charter, esei ta un otro storia p’ami. Nan ta gana sèn ku e turistanan. Hopi sèn, pasobra tin charter ku ta sali dos biaha pa dia. Mi ta kalkulá ku tin di nan ta gana entre 5.000 i 10.000 dollar pa siman ku e turistanan. Akiden mi no a konta e botin di piská ainda. Nan ta gana hopi sèn”, segun de Lanoy.

“E ta un storia di fantasia”, segun e futuro presidente di Bonaire Fishing Charter Association. Riba 22 di aprel shete doño di boto di charter operashonal ta bai pone nan firma serka notario pa un organisashon nobo. “E ta nesesario. Nos mester uni nos mes. I loke ku tin menshoná ariba ta un bunita ehèmpel. E no ta kuadra gewon. Mi ta puntra mi mes kon señor de Lanoy a yega na su informashon di volúmen di benta? Podisé e por kont’é un biaha mas p’ami. Banda di esei e ta lubidá ku nos komo charter di peska tin mas gastu ku e piskadó lokal. Bo mester tene kuenta ku impuesto, hèngelnan karu, tarifa di mara, etcetera ku nos mester invertí den dje. Pues e ganashi ta hopi mas abou ku e loke el a menshoná den reunionnan anterior. Pronto nos ta bai uni ku e meta pa promové e deporte di peska. Nos tin gana di pone e deporte na Boneiru aki positivo riba mapa”. 

Paga èkstra 

Segun e presidente di Piskabon tin hopi volúmen di benta ku piskamente via charternan di peska na Boneiru: “Esei ta bèrdat. Aparte di e piská ku bo ta piska bo tin un entrada sigurá. Esei e piskadó lokal no tin. I e ora ei bo ta dje miserabel ei komo piskadó di un charter di peska pa paga sèn èkstra pa por piska na e FAD’s? Esei mi ta haña inakseptabel. Lo mi a haña korekto si bo ta duna un kontribushon èkstra na Piskabon ku e ganashi ku bo ta haña ku e loke bo ta piska na e FAD’s”.

“Den pasado nos a pone e buinan rònt Boneiru ku nos empleadonan. Nan tabata kuater. Dentro di dos luna a sobra solamente un FAD’s. Ku otro palabra, por piska na un reda so. I esaki ta un ku ta produsí malu. No opstante, komo charternan di peska nos tabata dispuesto pa traha huntu ku Piskabon.  E kondishonnan sinembargo ku a imponé riba nos tabata inakseptabel”, segun e futuro presidente di Bonaire Fishing Charter Association.

Diferensia di opinion 

Un piskadó lokal lo mester paga 300 dollar pa por piska na e FAD’s. E charternan di peska lo mester paga pues 200 dollar èkstra pa por piska ku su wéspetnan na e redanan. Segun de Lanoy e doñonan di e charternan di peska no ta dispuesto pa hasi esei”. “Ya pa dos aña kaba nos ta purba di hasi palabrashon ku nan tokante esaki. Nos a sugerí komo Piskabon pa kobra e charternan di peska 500 dollar pa luna. Nan no ke paga esei. E motibu ku nan a duna: ‘Nos ke pa trata nos meskos ku e piskadó lokal’. Mi no ta haña esei bon. Awor aki nos ta atendiendo ku gobièrnu, STINAPA i ku esnan ku ta duna pèrmit. Mi a eskalá e proseso. E ta apbsurdo, pero nesesario. Mester solushoná e problema  pa piska honestamente na Boneiru serka e FAD’s”. 

“Mi no ta di akuerdo ku esaki tampoko”, segun e presidente nobo di Bonaire Fishing Charter Association. “Den reunionnan anterior a papia ku nos mester a paga 200 dollar èkstra pa dia. Esaki ta for di tur proporshon. Nos no t’ei pa hasi Piskabon riku. Nos ta traha mesun duru ku e piskadónan lokal na Boneiru. Trata nos tambe igual e ora ei. Mi ta haña ku nos mester a siña haña otro. I no manera el a bai awor. Dia 22 nos ta bai uni. Probablemente nos lo bai pone nos propio buinan rònt Boneiru ku nos Asosashon. Tur hende mag uza eseinan, piskadónan lokal tambe. Nos ta wak futuro positivo”.