KRALENDIJK – Si e planan ku a keda kompilá pa pasado gabinete Rutte IV bira realidat, un grupo muchu mas grandi di siudadano na Boneiru, St. Eustatius i Saba lo bai kai den e tarifa di impuesto haltu di 35,4% na lugá di e 30,4% ku ta apliká te asina leu.

Kaminda e tarief haltu di 35,4% ta apliká awor solamente pa hende ku ta gana mas ku $322.769 dòler pa aña, e tarifa mas haltu segun e Plan di Impuesto BES 2025 lo mester bai konta pa tur hende ku ta gana mas ku 50.000 dòler pa aña. Esaki ta nifiká un redukshon di e grèns aktual di no ménos ku 84,6%. 

Kolegionan ehekutivo di Boneiru St. Eustatius, i Saba ta bisa di no komprondé e lógika tras di esaki, manera nan a ekspresá den un karta pa Ministero di Finansa nan Den Haag. 

Un primer opheshon ta ku e grèns di 50.000 dòler no ta bon argumentá. “Falta un análisis di forsa di kompra, pa wak ku e gruponan konserní lo por karga e oumentu aki, sin kousa problema finansiero serio”, asina por lesa den e karta. 

Un di dos opheshon ta ku e medida no ta tuma en kuenta e efekto riba famia ku por ehèmpel tin hopi yu. Ademas, en general tfalta un polítika di entrada adekuá pa dil ku gruponan vulnerabel den komunidat.  

Un di tres opheshon ku e islanan ta ekspresá ta, ku e redukshon di e gréns ta keda hopi serka di e  minímo sosial nobo. “Esaki ta bai kontra e intenshon pa reinforsa tambe forsa di kompra di gruponan ku un entrada promedio (middeninkomens). 

Ménos simpel

Un di kuater opheshon ku a keda ekspresá ta e riesgo ku e sistema di impuesto den futuro lo ta ménos simpel ku esun ku a implementá na 10/10/10, kaminda entre otro un asina ‘flat tax’ riba entrada tabata un di e partinan mas esensia di e sistema di impuesto.  “E medida aki ta bai kontra di un sistema di impuesto simpel, ku te awor a tin solamente un tarief haltu pa entrada hopi haltu mes.  “E proposishon riba e puntu aki, lo kondusí na un sistema mas komplíká ku mas kosto pa ehekutá esaki”, asina ta nota pa e karta ku a bai pa Ministerio.