KRALENDIJK – Sentro di trabou Plenchi di Trabou ta selebrá su di dos aña di eksistensia riba 10 di febrüari. E último dos añanan e organisashon a invertí konsiderablemente den mediashon pa trabou, aserkamentu di dunadó di trabou i fortifiká e oferta lokal. Den e último dos añanan a yuda 171 buskadó di trabou pa haña un trabou. Anualmente e organisashon ta organisá diferente programa di trabou pa di e forma akí yena e skarsedat na personal. Tur partisipante lokal ku partisipá den un programa di trabou tin garantia ku nan ta haña trabou i despues di finalisá esaki ku éksito, mesora haña un puesto serka un dunadó di trabou.

Via Plenchi di Trabou Entidat Públiko Boneiru, e ministerio di Asuntunan Sosial i Labor i e unidat SZW di RCN na Boneiru ta traha huntu pa trese e oferta i demanda riba merkado laboral mas serka di otro. Si buskadónan di trabou ta na un distansia grandi di e merkado laboral, Plenchi di Trabou ta hasi uso di instrumentonan di merkado laboral. Dunadó di trabou ta haña informashon tokante rekrutashon, selekshon i retenshon di personal i tokante posibilidatnan di suèldu. Tantu buskadó di trabou i doño di trabou komo organisashonnan di ayudo entretantu ta bon na altura kon pa yega Plenchi di Trabou. Na final di 2022 e sentro di trabou tabatin 479 buskadó di trabou aktivo, 372 dunadó di trabou ku ta pone vakatura, ku un total di kasi 1.000 vakatura presentá.

Na 2023 Plenchi di Trabou kier bai evaluá su instrumentonan di merkado laboral, amplia e merkado laboral i bai duna sosten mas dirigí na gruponan ku un limitashon laboral. Ademas ta importante pa traha riba finansiamentu struktural pa proyektonan di merkado laboral i durante un konferensia di trabou ku tur partido konserní Plenchi di Trabou lo presentá resultadonan di un investigashon di merkado laboral ku lo bai ehekutá. Tambe tin diferente programa di trabou riba programa, entre otro riba tereno di mantenshon di hardin, di kuido di aparensia, di limpiesa i di mekániko. Tambe e sentro di trabou di Boneiru den kolaborashon ku Entidat Públiko Boneiru lo duna un kontribushon na maneho di pobresa.

Tuma kontakto ku Plenchi di Trabou

Tantu dunadó di trabou komo buskadó di trabou por akudí na Plenchi di Trabou na Kaya L. D. Gerharts 12. E sentro di trabou ta habrí tur dia di trabou entre 08.00or i 12.00or i 13.00or i 17.00or. Esnan ku ta interesá por kana drenta òf traha un sita via [email protected] òf (599) 715-8346. Via www.plenchiditrabou.com dunadó di trabou por pone un vakatura i buskadó di trabou por registrá pa mediashon.