DEN HAAG – Hulanda ta invertí den kombatimentu di pobresa den Karibe Hulandes, pero preisnan ku ta subiendo ta hasi e pobresa pió. Esei ta pará den ‘Binnenlands Bestuur’,  un plataforma kualitativo pa ámtenarnan i atministradónan den tur nivel di gobièrnu Hulandes.

Hulanda ta bai invertí 30 mion euro den pobresa, vivienda i otro retraso den Karibe Hulandes. Na isla BES Boneiru ta parse si ku ta hibando awa laman. ‘Preisnan ta subiendo mas rápido.’

Miserabel

Turistanan di Hulanda ku ta bini pa fakansi no ta ripará esei i invershonistanan Hulandes Europeo ku ta invertí den propiedat inmóvil tampoko. Pero e pobresa i desigualdat di entrada i den basta un par di kaso kondishonnan di bibienda miserabel ta ekstremo na Boneiru

Poko poko, ku un stèm abou, un habitante di un kas tur dekaí na Rincon, Boneiru ta splika. E no por papia mas duru, pasobra despues di dos atake di kurason i un derame selebral e señora di 48 aña tin e energia di un hende di 84.

E kas dekaí tin bentana kibrá, plafòn ta biniendo abou, tin sker i buraku den e murayanan. I mas kas den Rincon tin buraku i sker asina. Pero mester bisa si ku tin kasnan grandi tambe den Rincon.

Bringa 

Huntu ku su kompañé di kas – ku tampoko no por traha pasobra e ta diabétiko – e tin 850 dòler pa luna. I e sèn ei ta kaba lihé. E averahe di un resibu di koriente ta 200 dòler pa luna i entrante 1 di yüli el a bolbe subi ku trinta porshento.

Hasi kompra na Boneiru a bira impagabel i esei ta trese tenshon kuné den famianan. Fuentenan ku ta traha ku e famianan aki ta bisa ku asta bringa e yunan den e famianan aki  ta bringa ku otro pa kuminda.

Garoshi pa yena kompras

Un Hulandes ku tin un bon entrada na Boneiru ta remarká: ‘Na Hulanda bo tin pa 100 euro un garoshi yen yen. Aki ku 100 dòler ainda bo ta mira e bom.’

Ta p’esei famianan hopi biaha ta skohe e kaminda barata. Serka Chines bo ta buska kuminda pa 35 dòler i bo ta traha porshon pa tres dia. Den supermarket bo ta gasta esei pa dia. I kuminda ku no ta  saludabel ta nifiká atrobe ku preshon haltu, keho di nir, diabétis ta hopi presente riba e islanan.

Angelina Kroon di Rincon tambe ta diabétiko. E no por para largu i p’esei ta difísil pa haña trabou, e ta bisa. I tambe e no por a traha pa un temporada despues ku su yu a muri a kousa di un aksidente di tráfiko riba e kaminda peligroso di Rincon.

E ta biba den un kas di zim ku ta kalor i kaminda e aire ta poko saludabel. E tin 560 dòler pa e sobrebibí. E daño perhuisio ku el a haña despues di e aksidente a bai pa Entidat Públiko pasobra nan a mir’é komo entrada, manera sa sosodé tambe den munisipionan  Hulandes Europeo, e ta konta. ‘Mi por a bien keda sin eksihí nada.’ 

Sobrebibí 

Pobresa na Boneiru ta entre 40 i 60 porshento, Clark Abraham, ku ta miembro di konseho insular pa Boneiru, ta bisa. E sosten Hulandes lo pèrkurá pa un subida di entrada di 28 porshento. Pero segun rapòrtnan ta resultá ku den e periodo ei preisnan a subi ku 38 porshento.

‘Pobresa ta nifiká aki ku bo mes no tin sufisiente sèn pa sobrebibí,’ Nolly Oleana ku ta visepresidente di un di e dos bankonan di kuminda na Boneiru ta bisa.

Segun profeshonalnan ta Hulanda mes a okashoná e problema di pobresa aki. Clark Abraham: ’10-10-’10 ora ku Boneiru, Sint  Eustatius i Saba a bira entidatnan públiko, tabatin un diskushon grandi tokante mínimo sosial.

Nos tabatin investigashon kaminda a resultá ku e mínimo sosial mester ta 1350 dòler. Hulanda a haña ku 950 dòler ta sufisiente.  Despues a resultá for di investigashon ku di bèrdat 1350 dòler ta e mínimo sosial. Pero e ora ei na 2018 Hulanda no a ahust’é.’

Segun Abraham esei ta bini tambe pa motibu di falta di influensia polítiko i atministrativo. Àmtenarnan na Den Haag ta kambia di puesto ku konsekuensia ku konosementu ta disparsé i e kasi 30.000 habitantenan ta muchu tiki pa sikiera skohe un miembro di Kamer. Abraham: ‘Kasi niun di e miembronan di Tweede Kamer tin un tio, un prima òf un suegro ku mester lucha pa biba bou di e sirkumstansianan aki.’

Por lesa un vershon mas ámplio di e reportahe aki den  Binnenlands Bestuur nummer 15.