KRALENDIJK- Agentenan di Kuerpo Polisial Hulanda Karibense djamars a tene un kòntròl di tráfiko den besindario di Playa. 

Durante e kòntròl di masoménos 3 pa 4 ora polis a parti 17 prosèsferbal pa manehá sin faha di seguridat i pa uso di telefòn selular tras di stür. Kuerpo ta hasi un apelashon na tur shofùr pa mantené nan mes na e reglanan di tráfiko. Durante e kòntròlnan aki agentenan lo sòru pa tur partisipante den tráfiko tene nan mes na e leinan preskribí pa nan mesun seguridat. Kontrolnan di tráfiko ta kontinuá ku regularidat i violashon di lei tin konsekuensianan severo.

KPCN ta rekordá automoblista ku bistimentu di faha ta pa nan mes siguridat. “Un faha di seguridat ta protehá okupante di un outo durante di un aksidente. Dor di uza e faha e persona protehá ta keda sinta riba su stul, no tin e posibilidat pa dal su kabes den winshil i no ta keda bentá den e outo p’aki p’aya. Dor di bisti bo faha di seguridat bo chèns di tin un aksidente mortal ta baha ku 30 pa 40%. Tambe patras den outo bo tin 20% ménos chèns di keda herida seriamente ora bo tin bo faha bistí”,segun KPCN. 

Tame polis a rekordá shofùrnan ku uzo di celular ora ta stür ta trese nan mes i tambe otronan den peliger. “Pone bo telefòn for di bista. Asina bo ta prevení e tentashon pa wak tòg”, asina bosero di KPCN ta konsehá.

Dokumentu

Na último lugá KPCN ta hala atenshon ku mester tin e diferente dokumentu nesesario na òrdu. Ta advertí ku e periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.

Polis ta alerta alabes ku violashon di regla òf kore sin dokumentu na òrdu por kondusí na un but te ku 225 dòler pa kada violashon.