Porfin ta parse ku Sekretario di Estado Raymond Knops i gezaghèber Edison Rina a kuminsá realisá ku tin masha tiki progreso ora ta trata di ehekushon di e Akuerdo intergubernamental o sea ‘bestuursakkoord’.

PORFIN, pasombra pa kalke hende ku ta biba na Boneiru esaki ta mas kla ku lus di dia, pa sigur un dos aña kaba. Te ku mashá resien, Knops i Rijna tabata insistí ku no tabata tin ningun problema.  

E sekretario di estado, hopi biaha sa reakshoná di forma iritá, pa no bisa ‘krepchi’ riba preguntanan krítiko di prensa lokal tokante e akuerdo atministrativo, òf skuchando komentario ku e asina yamá Programa Manager ta kompletamente invisibel. “Mi ta preferá ku e ta invisibel, pero ku sí tin progreso, na lugá ku e ta visibel, pero sin ku tin progreso”, asina Knops bisa dia 31 di ougùstùs 2020 den un kombersashon ku Bonaire.nu.

Gezaghèber Rijna a bai asta mas leu. “E dos añanan tras di lomba nos a logra hopi, pero un gran parti di e trabounan a wòrdu hasí tras di kòrtina”, asina Rijna a bisa den un konferensia di prensa dia 21 di febrüari di e aña aki, huntu ku Programma Manager Danny Rojer.

Rojer, agregando na palabra di Rijna, a bisa ku ‘na komienso di aña’ lo kuminsá ku renovashon di entre otro Kaya Grandi. “E diseño ta kla kaba. Pa Kaya Amsterdam i pa Kaya Debrot ta trahando ainda riba e diseño, kaminda ta inkluí tambe e drenahe di awa i tambe e sistema di kloaka. E trabounan aki mester kuminsá na mitar di aña 2021, asina Rojer a splika.

Den un ‘Komunikado pa prensa’ di djarson pasá sinembargo, Knops i Rijna diripiente ta laga sa ku “Nos ta preokupá pa e (falta di) progreso pa ehekushon di e Bestuursakkoord. Tin diferente proyekto, kaminda no tin sufisiente progreso. Nos ta di akuerdo ku diferente elemento, entre otro e drechamentu di kaminda, mester bai mas rápido’.

Riba su mes por bisa ku ta positivo ku e mandatarionan awor ta admití, al ménos, ku tin poko progreso i ku -pa awor- por konstatá ku tin un retraso konsiderabel den ehekushon di e programa. Remarkabel sí ta ku te asina leu tabata insistiendo, ku kos tabata kanando ‘na mil maravilla’. No mester di un análisis mashá profundo, pa a konstatá ku esaki no ta kuadra ètòl ku realidat. Kalke siudadano ku ta hasi uso di nos karetarenan, sá di eksperensia propio, ku no tin ningun trabou di drechamentu di kaminda ta tumando lugá ni den Kaya Grandi, ni den Kaya Debrot, ni tampoko na Kaya Amsterdam.

Mi no sa si e solo echo ku Knops i Reina ta atmití awor ku kos no ta kanando bon, ta sufisiente pa duna e siudadano speransa nobo òf ku esaki ta inspirá mashá konfiansa. E kos mas importante ta ku por fin kuminsá mira moveshon, i no solamente promesa falsu i -hopi biaha- poko realístiko.

Tambe lo ta un gran kos, si e dos mandatarionan en kestion kuminsá reakshoná ku un poko ménos iritashon riba pregunta krítiko di prensa lokal, spesialmente ora nan sa bon-bon ku e preguntanan aki ta  kompletamente na nan lugá.