WILLEMSTAD – For di e disolushon di Antias Hulandes na 2010, Kòrsou i St. Maarten ta forma un union monetario (CSMU). Den e Landsverordening Deviezenverkeer tin stipulá ku mester bini un área di divisa ku un moneda komun ku ta mará na e dòler Merikano. 

Ta papia aki di e Florin Karibense ku mester a keda introdusí for di 2010. No ta konsehabel pa keda usa e Florin Hulandes Antiyano (Naf) komo moneda pa largu tempu mas. Motibunan ta entre otro e stòk di moneda i plaka di papel, spesifikashonnan ku ta antikuá, kostonan di produkshon haltu i e riesgo grandi ku tin pa falsifikashon teniendo kuenta ku desaroyonan teknológiko. Te ku awor aki CSMU, pa motibu di sirkunstansianan, a mantené e Naf komo moneda. Pero awor si ta tempu pa kambio.

Durante e ultimo 12 añanan, introduskhon di e Florin Karibense a keda posponé. Motibunan pa esaki tabata e situashon di nos ekonomia ku durante añanan tabata malu i e situashon a wòrdu empeorá dor di e pandemia di COVID-19. Esakinan tabata motibu dikon na yanüari 2022, Konseho di Minister di gabinete Pisas II a pidi pa posponé e preparashonnan pa e introdukshon di e Florin Karibense te ora e impakto di COVID-19 keda minimalisá. Den e seis lunanan tras di lomba nos ekonomia ta rekuperando debí na eliminashon di e medidanan di COVID-19. Banda di esaki minister di Finansa i su ministerio, gabinete i demas kolaboradó a registrá resultadonan positivo den finansa públiko i e posishon di likides di Kòrsou.

Stabil

Por bisa ku nos ekonomia ta mas stabil i no ta forma un opstákulo mas pa keda wanta e proseso. Konseho di Minister a akordá e proposishon pa kontinuá ku e introdukshon di e Florin Karibense den e di dos siman di yüli 2022. Minister di Finansa di Kòrsou huntu ku minister di Finansa di St. Maarten i CBCS lo determiná e fecha di introdukshon di e Florin Karibense, ku promé di yanüari 2024 komo meta.

Komo Pais Kòrsou nos tin e libertat pa krea nos propio identidat (kultural) i segun minister Silvania e Florin Karibense tambe ta forma parti di esaki. Mirando nos pasado nos por ta orguyoso di nos desaroyo komo Pais. E orguyo ku nos tin pa nos bandera for di 2 di yüli 1984 i e entusiasmo ku pueblo tin pa nos eskudo nobo, nos mester tin’é tambe pa e Florin Karibense.