KRALENDIJK- Segun diputado di Finansa, Hennyson Thielman ta bisa ku no por mir e oumentu di prèis na Boneiru lòs di desaroyonan mundial. 

Segun Thielman, gobièrnu di Boneiru ta hopi alerta pa ku e situashon aki i ta tumando diferente paso pa por logra mantené òf mehorá forsa di kompra. Luna pasá Kolegio Ehekutivo di Boneiru a aserká gobièrnu Hulandes pa por baha aksèins riba gasoline. Esaki a duna komo resultado un kompensashon di 16 sèn riba preis di gasolin. Sin e redukshon di aksèins aki, preis di gasolin lo a subi ku 22 sen enbes di un subida di 6 sen.

Otro paso ku a tuma ta, ku a kuminsá sinta ku supermerkado i e produktornan i importadornan pa yega na un maneho i kòntròl di preis pa diferente produkto di nesesidat básiko. “Nos ta konsiente ku e situashon ta hopi preokupante. Pesey nos ta den konsulta ku e supermerkadonan i importadornan pa por yega na un sistema pa fiha preis máksimo pa sierto produkto di promé nesesidat i ehekutá un kòntròl di preis hustu,” segun diputado Thielman enkargá ku asuntonan ekonómiko. Mester realisá ku ta importante pa implementashon di preis máksimo riba produkto i komustibel keda ehekutá na un manera balansá, di forma ku por sigui importá e produkto sin problema. Asina ta evitá ku no ta ofresé e produktonan mas, manera a sosodé den pasado.

Guerra

Tur parti di e proseso pa produsí i trese un produkto seka e konsumidó ta aktualmente afektá dor di e guera na Ukraína. E proseso aki ta konsistí di tur aktividat for di e orígen te ora ku e konsumidó kumpra e produkto final. “Preis di grano, ku ta e kuminda pa galiña ku ta pone webu, a subi drástikamente. Preis di gasolin pa transportá e grano for di su lugá di orígen te na e kunukero di galiña tambe a subi. Tur esaki ta kòusa ku preis di e produkto final, den e kaso aki webu di galiña, tambe ta subi.” Pa por garantisá kondishonnan hustu pa produkshon lokal di webo, i alabes protehá interes di e konsumidó, lo bai ahustá preis máksimo tambe pa webo di galiña produsí lokalmente.

Insentiva

Gobièrnu di Boneiru ta introdusí insentiva pa stimulá produkshon lokal di kuminda, i próksimamente lo sinta ku gobièrnu Hulandes pa papia tokante e posibilidat pa redusí e tasa di ABB riba sierto produkto i servisio. “Aunke e subida di preis ta un situashon mundial, nos ta tumando diferente pasonan pa yuda mitigá e efektonan i limitá e òumento di preisnan dor di bin ku diferente medida pa termino kortiku,” Diputado Thielman a sigui splika.