KRALENDIJK- E prèis pa un dozèin di webu na Boneiru ta bai subi ku un dòler entrante 11 di aprel venidero. E subida di prèis ta e promé subida den 5 aña di tempu.

“E subida di prèis ta wòrdu okashoná pa un subida den materia prima i otro faktornan di produkshon”, asina produktornan Punta Blanca Farmas i Bienaventutra Farms a skibi den un deklarashon konhuntu djarason. E prèis nobo ta bira di 3 dòler ku 80 sèn. 

Skarsedat

E keho mas grandi aktualmente na Boneiru no ta dje tantu e prèis, si no e skarsedat di webu ku tin den último simannan tras di lomba. Asina ku tin stòk nobo ta drenta na un supermerkado, nan ta kaba rápidamente atrobe. Por nota hopi pregunta riba internèt di konsumidó ku ta puntra kua supermerkado òf pakus tin webu ainda.