KRALENDIJK –  Atrobe a surgi intrankilidat pa loke ta trata e maneho ku Fundashon Mariadal ta hiba si ta trata mandamentu afó ku avion ku urgensia pa finnan médiko di pashèntnan for di Boneiru.

E kompania Sarpa ku Fundashon Mariadal a kontratá no ta disponé di e pèrmitnan nesesario pa ehekutá buelonan entre e islanan, ku konsekuensia ku Fundashon Mariadal ta transportá pashèntnan di Boneiru mas tantu pa Colombia.

Ounke e transporte ei dimes ta dura mas largu ku hiba e pashèntnan Kòrsou òf Aruba ku ta mas serka, un problema adishonal ta ku e avion ku Sarpa ta uza mester di dos biaha mas tantu tempu, ku e djètnan ku Medicair, un kompania lokal, a uza anteriormente.

Ounke Fundashon Mariadal na luna di mart último ya a haña un sero riba e petishon pa èksihí un medida provishonal serka wes, el a keda ketu despues riba e manera ku e ke duna forma awor na e transporte urgente di pashèntnan. Ta parse ku pa awor e hòspital ta evitá mas tantu posibel mandamentu afó pa Aruba òf Kòrsou, na fabor di mandamentu afó pa Colombia, kaminda si Sarpa mag bula.

Hunga ku bida di hende

Den e dianan ku a pasa a bin dilanti kon grandi e konsekuensianan di e maneho, ku Mariadal ta hiba, por ta ora a resultá ku no por a transportá un pashènt prosedente di Haiti pa Colombia, pasobra ku un pasport Haitiano e no por drenta Colombia sin visa. E situashon di e pashènt tabata empeorando konsiderablemente, sin ku e pèrmit ku a pidi di Colombia a drenta. Despues di intervenshon di diputado Nina den Heyer i gezaghebber Nolly Oleana a disidí pa transportá e pashènt finalmente ku e Learjet di Medicair.

Hopi ta esnan riba e isla ku no a komprondé e aktitut di Mariadal i mientrastantu ta kalifiká esaki asta komo peligroso. “Mariadal ta hunga ku bida di hende”, e matutino Èxtra a pone djaweps mainta ku lèternan grandi riba e página di Boneiru. Diferente miembro di konseho insular a ripití e ekspreshon aki mas lat e dia ei den un reunion di komishon fiho di Komunidat & Kuido.

Asombro 

Riba e isla ta papia di un asombro ku ta kresiendo mas i mas pa loke ta trata falta di intervenshon di instanshanan manera Inspekshon di Salubridat i Ministerio di VWS. Ta parse ku ámbos instansha no ta kompetente òf dispuesto pa intervení den e loke ku hopi ta kalifiká komo un maneho terko di e direktor di hòspital Giovanni Frans i e kordinadó di logístika Felix Greving ora ta trata e problemátika di e Ambulans Aéreo

Mientrastantu Kolegio Ehekutivo a bolbe pidi Fundashon Mariadal un splikashon por eskrito. Komunikashon anterior ku Mariadal sinembargo no a duna muchu bista den e motivashon- òf e intenshonnan di e hòspital ku ta imagin’é ku e ta kompletamente outónomo, kaminda no tin nodi di duna kuenta na nada ni ningun hende tokante e maneho ku e ta hiba. Anteriormente e bosero di e hospital a laga sa kaba ku lo no kontestá preguntanan di prensa riba e tópiko aki.