KRALENDIJK- Próksimo siman lo tuma lugá trás di pòrtanan será reunion tokante kambionan proponé den e dos leinan prinsipal pa e islanan BES, Lei pa Entidatnan Públiko BES (WolBES) i Lei Finansa pa Entidatnan Públiko BES (FinBES).

Bou di liderazgo di Sekretario di Estado Alexandra van Huffelen, tin algun tempu ta trahando kaba  pa trese sierto kambionan den e dos leinan aki. E tres islanan BES sinembargo tin nan propio  pensamentu tokante e kambionan riba mesa, i kier tin mas interkambio i reunion ku e sekretario di estado tokante esakinan. 

Segun diputado Clark Abraham, e kòmbersashonnan ku representantenan di Ministerio di Asuntunan Interno i Relashonnan Reino (BZK) lo ta un esfuerso konhunto entre e konseho insular i e Konseho Ehekutivo. “Esaki ta di un importansia asina grandi, ku nos mester atendé esaki konhuntamente ku ambos órgano, esta Kolegio Ehekutivo i Konseho insular. 

Traha huntu

Abraham menshoná tambe ku ora ta trata di e kambionan propuesto, ta trahando huntu tambe ku e dos islanan hermana St. Eustatius i Saba.