WILLEMSTAD – Ta pa promé biaha ku muchanan muhé Kurasoleño di famianan marginá ta sigui un formashon básiko spesial. Sociaal Vormingstraject SVT na kazèrne militar na Suffisant ta duna e hóbennan mihó perspektiva pa futuro. E organisashon ta un kolaborashon entre Militarnan Kurasoleño, CURMIL, gobièrnu lokal i Marina Real.

Siman pasá djesun dama hóben a kuminsá boluntariamente ku un kurso ku ta dura djeskuater siman. E klas ta konsistí di personanan ku a kita tempran for di skol, ku poko perspektiva riba un trabou òf un formashon adishonal.

Durante e trayekto di formashon nan ta siña konosé e límite di nan kurpa hasiendo deporte. Tambe nan ta siña téknikanan di kòmbersashon pa por ehèmpel hasi un bon papel durante un kòmbersashon di solisitut.

Base militar

E entrenamentu tin un base militar, lider di proyekto di SVT, Promé Ofisial Ramiro Look di CURMIL ta bisa. “Pero e partisipantenan no ta bai tira sigur ku nò. E ta primeramente pa siña nan habilidatnan básiko i ofresé nan un mihó futuro.”

E hóbennan ta haña e próksimo lunanan lès di militarnan i ekspertonan di afó. Nan ta bai hasi deporte, landa, ta haña lès di Hulandes, ta siña sobrebibí durante un kampamentu i ta eksperensiá kon ta pa traha den un tim.

Kòntraktnan fiho

Dos grupo di mucha hòmber a sigui e mésun trayekto anteriormente. Esei a duna bunita resultado. “E grupo meta ta hóbennan di djesocho te bintikuater aña. Algun di nan mientrastantu a haña un trabou fiho den horeca.”

Despues di partisipashon SVT no ta laga e hóbennan pa nan ‘kuenta’. Nan ta haña guia durante un programa di estudio kombiná, pero aki Defensa no ta embolbí. Esei ta bai via di gobièrnu di Kòrsou.