DEN HAAG- Pa tur hende na Boneiru, Sint Eustatius i Saba mester ta fásil i konfiabel pa regla asuntu di gobièrnu. Esaki mester ta e kaso ora bai personalmente, pero tambe online. Pa e motibu aki, habitante di e islanan Boneiru, St. Eustatius i Saba lo haña un número di servísio pa siudadano, e asina yamá BSN na aña 2025. Esaki ta esensia di un proposishon di lei ku awe a wòrdu mandá pa Parlamento Hulandes pa sekretario di estado Szabó (Digitalisashon i Relashon di Reino BZK).

E introdukshon di e BSN ta un promé paso pa mehorá e servísio di gobièrnu. Aparte di e servísio na e bali, siudadanonan lo por regla asuntu ku e gobièrnu mas i mas online den futuro. Naturalmente e servísio aki mester ta sigur i konfiabel. Pa esaki ta nesesario ku tur hende tin un number di persona konfiabel i un manera pa login pa tur servisionan di gobièrnu. E BSN ta duna gobièrnu siguridat di e identidat di un persona. A largo plaso lo por usa esaki na tur servisio di gobièrnu na ambos e parti Karibense i Europeo di Hulanda. Mayoria di siudadano te awor aki tin awor un number di sédula. E number aki lo keda den uso temporalmente, despues di e introdukshon di e BSN.

Raad van State
Raad van State mientrastantu a duna un konseho positivo tokante e proposishon di lei. Pa loke ta trata algun tópiko, e proposishon a wòrdu ahustá den kordinashon ku gobièrnunan di Boneiru, Sint Eustatius i Saba. Un kambio importante ta ku e inklushon di e BSN riba sédula a wòrdu saká for di e propuesta di lei. Entidatnan públiko lo ta responsabel pa ortogá e BSN na su propio habitante, meskos ku ta e kaso na munisipionan na Hulanda.