WILLEMSTAD – E aktivista Kurasoleño Marlon Regales ta pone e nòmber Willemstad, kapital di e isla Antiano, na diskushon. Segun Marlon e ta un nòmber kolonial i no ta pas den e tempu di awor mas. E ke pa ekspertonan di Kòrsou bini huntu pa papia di nòmbernan nobo.

Segun Marlon esei ta konta tambe pa otro nòmbernan ku Hulanda a yega di duna, manera Julianaplein i West Indische Compagniestraat. Esei ta segun Marlon un konsekuensia di un moveshon ku bo ta mira den hopi pais.

“Na Merka nan ta hasi daño na estatuanan di Columbus. Nos mester evitá ku aki na Kòrsou tambe personanan ta subi kaya pa esaki i bai destruí kos. Ta p’esei nos mester kuminsá pensa riba kambionan”, segun Regales, ku a reakshoná riba un yamada di e movishon pa independensia Independence for St. Martin Foundation.

E fundashon a aserká siman pasá parlamento di Sint Maarten ku e petishon pa kambia e nòmber ofisial di e kapital den Great Bay. Segun e fundashon e nòmber Philipsburg ta “ofensivo”. Parlamento di Sint Maarten ta bisa di tuma e sugerensia den konsiderashon.