KRALENDIJK – UNKOBON ta hasi un yamada na Tweede Kamer pa forsa gobièrnu Hulandes garantisá un minimo soshal pa e islanan BES ekivalente ku a stipulá esun pa Hulanda. Esaki tin ku sosodé durante e debate riba e nota di primavera dia 15 di yüni próksimo. Unkobon ta konfia ku Kolegio Ehekutivo di Boneiru sostené e yamada aki.

Partidanan den e Centraal Dialoog Bonaire (OLB, dunadó di trabao, sindikato i KvK) a firma un deklarashon unda nan i kabinete Rutte IV a kometé nan mes pa hiba e seguridat di eksistensia di e habitantenan di Boneiru té na e nivel di e punto di referensha soshal. E firmamentu aki a tuma lugá durante e bishita di Minister Carola Schouten resientemente.E ambishon ta bon pero lamentablemente e oferta di e gabinete no ta sufisiente.

Den e deklarashon ta pará: “Trahando simultaneamente riba: mehorashon di salario, redusí gastunan nesesario i invertí den un plan soshal, lo ta un avanse pa kuminsá aportá na e seguridat di eksistensia di e habitantenan”. Un movementu nesesario despues di un maneho di posponementu i kanselashon ku a dura 12 aña pero ku lamentablemente ainda no a tene kuenta ku un minimo soshal humano i digno pa e habitantenan.UNKOBON tin komprenshon ku e partidanan den e Centraal Dialoog a firma e deklarashon tòg komo ku despues di tantu aña di pasividat sikiera algu ta sosodiendo. Unkobon ta hasi un yamada na e partidanan pa sigui bringa pa mas.

Na promé lugá deklarashon di un ambishon kon yega na un punta di salida pa un minimo soshal no ta meskos ku un kompromiso firme. E gabinete Rutte anterior tambe a papia tokante intenshon i ambishon tokante un minimo soshal pero ku nunka a yega na un resultado konkreto.

Ta pesei UNKOBON ta lucha pa un  kompromiso firme. Preferibelmente den koperashon estrecho ku e partidanan den Centraal Dialoog Bonaire.

Lástimamente ku ainda un minimo vital aseptabel i desisivo pa e habitantenan di Boneiru no ta visibel. Kaminda pa e habitantenan di Hulanda tin un minimo soshal stipulá ainda habitantenan di islanan BES ta sperando riba esaki. E trato disigual aki lo kontinuá hasta ku tur e intenshonnan formulá den e deklarashon keda realisá na 2025. Simplemente pasobra e intenshonnan ta insufisiente. Fuera di esei ta un abuso pa laga e pobresa ekstremo, pa algun di nos habitante un realidat duru, sigui kontinuá pa tres aña mas.

Igual ku e mandatarionan anterior, Minister Schouten tambe ta nenga di rekonosé e nesesidat pa un minimo soshal adekuá. No ku palabra pero si kon e maneho ta pa futuro. Repetidamente ta hasi un kalkulashon di un punto di referensha teorétiko. E kosto di bida real ya pa años ta 40% – 50% mas haltu ku e punto di referensha. Ke men ku mester mehorá e ambishon i e tèmpo pa hasi esakimester subi. 

Igual ku e habitantenan na Hulanda habitantenan di islanan BES tambe tin derecho riba un digno minimo soshal.

E argumento ku e maneho proponé lo ta sufisiente komo ku gobièrnu Hulandes lo bai baha kosto di bida, ya pa años ta wòrdu huzá. Sinembargo ningun habitante ta eksperensiá resultado di esaki. Tur hende riba islanan BES ku ta hasi kompras na supermerkado por konfirmá esaki.

Pa yega na un minimo soshal ekivalente na e punto di referensha proponé pa 2025, e gastunan di kosto di bida mester baha drástikamente den e próksimo tres aña. Hasta si den e añanan 2022 te ku 2025 no tin inflashon, por kalkulá basá riba e gastunan di 2022,

ku gastunan mensual pa un soltero mester a baha den 2025 ku $ 560,00 i pa un pareha ku $ 1035,00. Pues un bahada gigantesko ku apsolutamente no por wòrdu lográ ku e supsidio proponé riba uzo di awa, manera indiká den e deklarashon.

Ta pesei Unkobon ta haña ku awó ta e momento pa oumentá e preshon riba gobierno Hulandes. E punta di salida ta e promé stap, pero e stap ei mester bira muchu mas grandi i tambe mester kana muchu mas lihé. UNKOBON ta konta riba un koperashon fruktiforo ku e partidanan den e Centraal Dialoog Bonaire i riba sosten di e habitantenan. UNKOBON ta alkansabel i habrí pa tur pregunta i sugerensha riba e tópiko aki.