Kralendijk – dia 16 di augustus último a selebra e di 300 fiansa suministrá  dor di Qredits Boneiru. E di 300 mikokrédito a keda ortogá na empresario Andrew Sint Jago. Danki na e fiansa di Qredits, Andrew  por a kumpra un ‘septic’ trùk pa su empresa ‘Diamond Septic Services’. Qredits ta aktivo for di 2015 na Boneiru. Empresario nobo i eksistente por bini na remarke pa un mikrokrédito di un maksimo di $50.000,- pa finansiá e komienso of ekspanshon di nan empresa.

Señor Elwin Groenevelt, Direktor di Qredits, Diputado Hennyson Thielman representando Entidat Públiko di Boneiru i e tim di Qredits Boneiru a entregá un chèk simbóliko na empresario Andrew Sint Jago. Andrew Sint Jago ta un empresario lokal i ta ‘pipefitter’ di profeshon. E ultimo añanan Andrew tabata enkargá ku mantenshon di un edifiso kaminda ta duna atenshon pa hóbennan despues di skol (‘naschoolse opvang’).  Andrew a establesé su empresa den mei 2021. E empresa ‘Diamond Septic Services’ no solamente ta ofrese e servisio di hala berpùt pero tambe ta yuda ku entre otro reparáshon di ‘riolering’ i opstrukshon.

 Qredits Boneiru tin komo meta sostené empresarionan pa start nan negoshi òf inbertí den nan empresa eksistente. Esaki dor di ofresé entre otro mikrokrédito te ku un suma di $50.000, coaching, i medionan pa desaroyá na e empresario i su negoshi. Tambe Qredits ta ofresé krédito transitorio yamá ‘corona-overbruggingskrediet’ na un montante máksimo di $40.000,- pa yuda empresarionan sobreviví e efektonan di e krísis  aktual di corona. E empresario ta paga un interes entre 1.75% i 6.75% durante e periodo di fiansa. E porshento di interes apliká ta dependé di tipo krédito transitiorio.

Qredits a habri su portanan den 2015 na Boneiru i su ofisina ta situá na Kaya Industria 15-G. Entretantu Qredits a risibí hopi aplikashon pa tantu fiansa mikro i krédito transitorio di empresarionan lokal. Aktualmente tin 300 krédito otorgá i tin hopi petishon ainda den proseso. E tipo di empresanan finansiá ta hopi variá i ta aktivo den diferente sektor. Tur tabata tin difikultat pa yega na fondonan finansiero i tabata tin mester di e empuhe nesesario. Qredits ta haña importante pa e empresario tin ganashi den tur sentido di palabra. Pa e motibo ei Qredits – komo entidat finansiero sin metanan lukrativo – ta ofresé krédito, kurso i konseho na su klientenan. Tur kos pa bo ganashi!  

Pa mas informashon tokante di Qredits Boneiru i nos produktonan finansiero i edukativo, por bishitá https://bonaire-nl.qredits.com/. E wèpsait aki ta disponibel na dos idioma: Hulandes i Papiamentu. Petishon pa un krédito por keda hasí na un manera fasil i simple via di e wèpsait.

---

Lesa tambe:

• 
  Partnernan di CAO pa Islanan BES a topa pa deliberá riba desaroyo 
• 
  Prevení Zika, Dengue i Chikungunya
• 
  Organisashonnan Karibe Hulandes ta traha huntu pa preveni violensia kontra hende muhé
• 
  Sindikalismo na Boneiru parti 47, 25 di novèmber 2024
• 
  Curoil ta hasi su mes kulpabel na komportamentu sin rèspèt, pero gobièrnu ta tolerá esei