KRALENDIJK – Turismo ta e sektor mas importante den ekonomia di Boneiru, ku un balor agregá di mas o ménos 30% di e Produkto Bruto  Nashonal (PBN). Esaki ta keda kla for di e Rapòrt di Komishon Estatal di Desaroyo Demográfiko di Hulanda Karibense 2050 ku a keda publiká resientemente.

E rapòrt ta indiká tambe ku mas o ménos 23% di e empleo riba e isla ta relashoná ku turismo, ku hopi hóben ku ta traha den e sektor di turismo. E papel grandi di e sektor turismo ta hasi ku ekonomia di Boneiru sensitivo pa fluktuashon ekonómiko i shòknan eksterno.

Debí na un ekonomia relativamente unilateral, segun e rapòrt, tin poko oportunidat pa otro sektornan pa kompensá durante periodo ku tin poko turismo. Komo un ehèmpel resiento kaminda por a mira aki, ta tabata durante e pandemia di COVID-19.

E papel signifikante di turismo ta nifiká tambe ku ekonomia di Boneiru ta estrechamente liá na su rikesa natural. Hopi turista ta bishitá e isla spesífikamente pa su klima i naturalesa. “Tantu e parke naturalnan komo e refnan ta konosí komo lugánan bunita pa buseo,” e komishon ta menshoná.

“Sinembargo, e konekshon fuerte ku naturalesa tambe ta trese su riesgonan. Si e medio ambiente natural no ta sufisientemente protehá, tin un riesgo ku e kantidat di turista lo baha den futuro”.

Riesgo di kambio klimátiko

Kambio klimátiko ta un otro faktor di riesgo pa naturalesa, i konsekutentemente pa e ekonomia di Boneiru. Pesei, Boneiru ya poniendo énfasis riba turismo sostenibel i desaroyo di un asina yamá ‘blue economy’: Un ekonomia ku ta manehá e rekurso natural di manera sostenibel, partikularmente e laman.