Willemstad – Entrante 1 di febrüari 2023 Raymond Gradus ta renunsiá komo presidente di Kolegio di supervishon finansiero di Kòrsou i Sint Maarten, Kolegio di supervishon finansiero di Bonaire, Sint Eustatius i Saba i Kolegio di supervishon finansiero di Aruba. Di e forma aki su di dos término ta finalisá algu promé ku e fecha riba kua esaki lo mester a tuma lugá, esta 1 di yüli 2023. 

Gradus ta alabes profesòr di gobernashon i ekonomia di sektor públiko i sektor non-profit na Vrije Universiteit (VU) di Amsterdam. Kombinashon di e dos funshonnan aki ta un responsabilidat pisá, asina e ta menshoná. Ademas durante e lunanan benidero Gradus kier hasi vários biahe dirigí riba e mundu akadémiko. E ta mira atras riba añanan fasinante i intensivo komo supervisor finansiero di e islanan i paisnan di e loke anteriormente tabata Antia Hulandes.

Susesor

Segun Cft a komuniká, aktualmente ta buskando un susesor adekuá, ku lo kuminsá den e funshon entrante 1 di febrüari 2023.

Gradus ta presidente di Cft for di 1 di yüli 2017. Riba 1 di yüli 2020 a renombrá dr. Gradus pa un di dos periodo di tres aña. Banda di su funshon di profesòr, e tin vínkulo tambe ku Departamento di Accounting di VU i ku Sentro Zijlstra pa Kòntròl Públiko, Liderazgo i Gobernashon (Zijlstra Center for Public Control, Leadership & Governance) i e ta miembro di nivel halto (fellow) di Instituto Tinbergen. Prof. 

Gradus tin vários publikashon sientífiko riba su nòmber tokante, entre otro, seguridat sosial, co-gobernashon, maneho di medio ambiente i finansa públiko. Ademas e ta presidente di e Komishon di Ouditoria di Konseho di Supervishon di Skol Superior di Den Haag (HHs).