WILLEMSTAD –  E sosiedatnan anónimo di gobièrnu RdK i CRU ta konfirmá ku e krudo ku e tènker ‘Colon’ a entregá 28 di sèptèmber aña pasá tabata prosedente di Venezuela. Pero nan ta desmentí ku nan tabata  embolbí.

Den e deklarashon di e propietario di refineria Isla RdK i filial CRU e dos empresanan ta mustra den direkshon di CPR, e susesor previsto di PdVSA pa bai eksplotá e refineria i e terminal di almasenahe.

Tantu CPR komo RdK/CRU no por mustra un asina yamá ‘sanction relief’, un prueba ku e empresanan tin pèrmit pa transportá, importá i almasená krudo Venezolano bou di e sanshonnan Merikano kontra presidente Maduro.

Ademas Colon no ta e úniko barku ku aparentemente tabata transportá krudo Venezolano ilegal pa Kòrsou. Riba 19 di novèmber e tènker Nimbus GAS a yega direktamente for di Punto Fijo.

Ku e deklarashon di prensa di RdK/CRU ta parse ku e dos empresanan di gobièrnu ta aktua kontra e akusashonnan den otro media di Kòrsou, komo sifuera e propietario di e refineria ta aktuando insufisientemente den e due diligence ku e ta realisá na CPR.

Siman pasa a sali na kla ku a falsifiká dokumentunan den e proseso ei. Tanten ku e investigashon ta kanando, minister di hustisia Hato no ta duna mas komentario.