WILLEMSTAD – Refineria di Kòrsou, doño di e refineria, ta atmití den un deklarashon por eskrito ku Caribbean Petroleum Refinery a suministrá dokumentunan falsifiká. Eiden tabatin garantia di finansiamentu pa eksplotashon di refineria Isla na Bullenbaai.

Pero segun e sosiedat anónimo di gobièrnu RDK no tin indikashon ku ta CPR mes a falsifiká e dokumentunan òf ku e tabata embolbí. CPR mes lo a mustra RdK riba e posibilidat ku aki ta trata di dokumentunan falsifiká.

Den un deklarashon di prensa por lesa ku RdK i CPR a tuma mésora tur medidanan nesesario i a terminá e komunikashon ku e invershonista konserní.

Partidonan ta keda negoshá i ta bisa di tin fe ku esaki lo kondusí na un ‘Heads of Agreement’. Mester a firma esei for di fin di ougùstùs kaba. Probablemente e retraso aktual ta konsekuensia di falta di klaridat di invershonistanan.

Gobièrnu di Pisas no a reakshoná ainda riba e situashon. E promé minister a laga sa si riba Facebook ku hendenan no mester pèrdè speransa pa loke ta trata apertura di e refineria. Ta trata di un trayekto difísil, kaminda no tin lugá pa pániko. “Esei ta okashoná mas daño na e negosashonnan.”