Resientemente gabinete Hulandes a indiká nan intenshon pa for di 2023 subi salario mínimo anualmente te ora na 2025 esaki yega na e montante di e sosial mínimo manera indiká den e investigashon hasi pa Regioplan. Esaki, segun ta bisa, lo ta ta un subida di 28%.

Na promé instante esaki ta mustra positivo, konsiderando ku hopi kas di famia ta biba den pobresa, pues kualke subida di entrada lo ta un ailvio mas ku bonbini. Solamente ora bo bai enfoká riba e echonan bo ta realisá ku esaki no ta masha di kanta makamba manera ta wordu insinuá.

E resultado di análisis di e Regioplan a keda presentá 28 di yüni 2018, for di fecha aki Boneiru a konosé un inflashon akumulativo di 19% te ku e promé kuartal di e aña aki, esaki hasta inkluyendo un deflashon  remarkable (-14.2%) pa motibu di e medidanan di Corona vírùs.

Si e tendensia ekonómiko aki kontinuá, Boneiru lo bolbe eksperensiá un inflashon kumulativo di 19% te na final di 2025. Na total esaki lo enserá 38% di inflashon for di dia ku e montantenan den Regioplan a keda stipulá. Dimes lo indiká ku ta adaptá e salario mínimo tur aña konforme sifra di inflashon, pero si bo kuminsá ku un montante nominal abou i despues koregí esaki a base di un porsentahe, e korekshon nominal tambe lo keda abou.

Si nos koregí e sosial mínimo di USD 1349,– pa un persona soltero, manera indiká den e Regioplan, a base di 38% di inflashon, ta resulta ku nan 2025 un persona soltero lo mester di un montante di kasi $1862,- pa por mantene su mes na un manera akseptabel. Esaki ta mas bien dòbel di lokual a keda stipula komo minimo sosial na luga di un subida di 28%.

Kiermen si no koregí e montante nan den Regioplan ku e inflashon akumulativo, esnan ku ménos rekurso lo bai aun mas atras na forsa di kompra den 2025 kompará ku lokual nan tabata kaba 2018.

Si esaki no ta e definishon di kumpra un gato na saku!

Clark Abraham

Lider di frakshon PDB