KRALENDIJK – E Representante interino di Reino, Jan Helmond, a informá di intervení temporalmente den e problemátika di sushi na Boneiru. Den un mensahe di video e ta proponé pa tuma over di Entidat Públiko Boneiru (OLB) e tareanan rondó di otorgamentu di pèrmit, supervishon i mantenshon na Selibon, sitio Lagun.

E medida ta konsekuensia di kehonan pa hopi aña kaba di habitantenan pa loke ta trata holó stinki i aire kontaminá, kombiná ku rapòrtnan alarmante di Inspekshon Medio ambiente i Transporte (ILT). E rapòrtnan aki ta mustra riba eksposishon króniko na supstansianan dañino i un fondo di laman seriamente kontaminá na Lagun. Tambe no tin pèrmitnan esensial di medio ambiente, i e supervishon a laga hopi di deseá pa añanan largu.

E kandela grandi na luna di mart e aña aki i e kandela di siman pasá na e lèntfel a hasi e preukupashonnan mas grandi. Durante e último kandela, siman pasá, e habitantenan mester a bolbe bandoná nan kas. Segun Helmond Boneiru a skapa por poko di un desaster ku tankinan di zeta ku por a eksplotá.

Negligensia di tarea i intervenshon 

Helmond  ta konkluí ku por papia di negligensia di tarea di parti di OLB. E ta proponé pa tuma e responsabilidat temporalmente over i tuma medidanan mas lihé ku ta posibel. E desishon definitivo ta sigui e siman aki.

Ounke e situashon ta urgente, Helmond ta suprayá e importansha di koperashon entre Selibon, OLB i e habitantenan. “Nos tin un problema komun i mester solushoná esei huntu,” e ta bisa. E meta ta un aserkamentu duradero pa prosesamentu di sushi riba e isla.