ORANJESTAD – Reshèrshi Nashonal di Aruba a tene un entrada hudisial  ayera mainta na 4 diferente lokalidat riba e isla, entre otro e kas di e anterior minister Chris Romero di e Partido MEP na Savaneta.

Èks-minister Edison Briesen tambe a haña bishita di reshèrshi nashonal na su kas na San Nicolas, pero di esei Ministerio Públiko no ta bisa nada. Briesen tabata un konsehero importante di Romero i tambe di e aktual minister Glenbert Croes di Labor, Energia i Integrashon.

Eumar Koolman ku tabata konsehero di Romero tambe a haña bishita di reshèrshi nashonal na su kas na Butucu. Aki tambe Ministerio Públiko no a bisa nada.

E entrada hudisial den e kasnan ta relashoná ku un investigashon di algun kontrakt di servisio, ku Romero a sera entre 2017 i 2021 komo minister di Transporte, Komunikashon i Sektor Primario, Ministerio Públiko ta bisa.

Riba e kuater adrèsnan a konfiská entre otro ophetonan ku informashonnan digital i atministrashon.

Reshèrshi nashonal ta enkargá ku e investigashon ku si tin delitonan kometé pa ámtenar i sobrá personanan den funshonnan públiko. Banda di esei Reshèrshi nashonal ta investigá insidentenan ku violensia ku personanan malheridá, kaminda agentenan spesial di investigashon posiblemente ta embolbí. Ta trata e ora ei un investigashon di e echonan i konteksto di e aktuashon di polis.