KRALENDIJK- Tin hopi fadansa na Boneiru serka restorantnan pero tambe konsumidó individual pa loke ta trata kalidat di e awakatinan ku ta bendiendo na e isla.

Atrobe ta parse di ta na moda ku ora habri e awakati, ounke di parti pafó e ta mustra bon bon, paden e ta pretu i putrí. Tur hende sa preis di awakati na Boneiru, sa tambe ku nan no ta barata i pa kumpra un kantidat di awakati putrí asina ta un daño ekonómiko bastante grandi.

E awakatinan riba e pòtret, ku a wòrdu saka dor di e shèf Johan Rojas ta papia pa su mes. Nan a wòrdu kumprá na un supermerkado grandi na Boneiru, situá na Kaya Industria.

Ounke no tabata inmediatamente kla for di unda e awakatinan a wòrdu importá tin e impreshon ku esaki ta sosodé mas lihé ku awakati ku ta bini for di Republika Dominikana, i menos lihé ku awakati ku ta importá di Venezuela, Colombia òf Merka. Esnan di Merka, sinembargo, en general ta di otro tipo ku esnan ku generalmente ta wòrdu bendé na Boneiru.