KRALENDIJK- Un reunion públiko di Konseho Insular djamars anochi no por a sigui pa motibu di e echo ku e partidonan ku ta forma koalishon, UPB ku MPB, tabata ousente. Pa motibu di nan ousensia, no tabata tin kuorùm den parlamentu insular pa por sigui ku e reunion. 

Tema prinsipal di e reunion públiko tabata e permit verbal ku gezaghèber Edison Rijna lo mester a ortogá na Chogogo Resort, di forma ku e hotèl nobo por a habri i kuminsá su perashon. E ousensia di MPB ku UPB ta remarkabel, tumando na kuenta ku djies promé ku e reunion públiko, tur dos partido tabata presente de un reunion di komishon fiho. 

Rabiá

Partido Demokátiko Boneriano (PDB) a reakshoná di forma basta indigná pa ousensia di e dos partidonan. Líder di PDB, Clark Abraham, a yama un konferensia di prensa pa djarason mainta 10 ‘or, pa sigui elaborá riba e asuntu. 

Riba medionan sosial por a skucha desaprobashon pa e ousensia di koalishon. Sin embargo, e reunion lo sigui djaweps awor pa 7 ‘or di anochi, ku òf sin kuorùm.