KRALENDIJK – E organisashon di interes Asosiashon Pro Lagun a pone na luna di òktober 2024 un ultimatum pa outoridatnan na Boneiru. Nan ta eksigí ku ta hasi un investigashon independiente pa loke ta trata salubridat públiko riba e isla, ku atenshon spesífiko pa e impakto di e kandelanan frekuente i desaroyo di huma riba e seru di sushi. E fecha límite ta aserkando. Por lo pronto ta parse ku no ta konsiderá e petishon pa un investigashon independiente di RVIM tokante salubridat públiko di e poblashon di Boneiru komo urgente.

Ya pa basta tempu e kandelanan riba e seru di sushi ta pèrkurá pa molèster i preukupashon serka habitantenan di Boneiru. Riba djarason 6 di novèmber  un kandela grandi ku huma tabata visibel riba Boneiru. Asosiashon Pro Lagun ta bisa ku e huma por tin konsekuensianan dañino pa salubridat públiko i ku mester intervení rápido. Apesar di e yamada aki ta parse ku Rijksinstituut voor Volksgezondheid en Milieu (RIVM) no a kuminsá ainda ku e investigashon independiente.

RIVM ta laga sa ku te dia di awe nan no a haña un petishon ofisial di outoridatnan di Boneiru pa hasi tal investigashon. Segun RIVM un petishon asina instanshanan ofisial so por entregá i no gruponan di habitantenan lokal. No ta kla ainda dikon outoridatnan na Boneiru no a hasi e petishon aki ainda.

Investigashon na Sint Maarten

RIVM ta indiká ku e tin eksperensia ku situashonnan similar. Antes nan a kondusí un investigashon di e kalidat di aire rondó di un seru di sushi na Sint Maarten. Durante e investigashon ei a midi konsentrashon di supstansianan dañino ku a surpasá e límitenan stipulá i e efektonan di salubridat pa e poblashon tabata deskartabel. Den e kaso ei sinembargo no tabata papia di kandelanan aktivo na momento di e investigashon, loke posiblemente por hasi un diferensia den e resultado.

Tambe RIVM ta bisa ku brantwer lokal di Boneiru posiblemente por hunga un ròl den hasi e midimentunan. RIVM por sostené brantwer den esaki ku aparato i konosementu, pero ta enfatisá ku nan mes no ta stashoná na Boneiru. Di e manera aki tumamentu di mònsternan di aire dor di brantwer por ta un opshon faktibel, ounke habitantenan na Boneiru ta duda den independensia i kapasidat di brantwer pa e tarea aki. E pregunta ta keda si e investigashon ku brantwer hasi lo por duna e transparensia i konfiansa deseá.

Asosiashon Pro Lagun i e habitantenan ta en espera si outoridatnan lo tuma akshon dentro di e término stipulá di 30 dia i si nan lo pidi yudansa di RIVM. 

Mientrastantu e inseguridat pa loke ta trata e rísikonan di salú ku e huma di e seru di sushi probablemente ta trese kuné ta sigui eksistí.