THE BOTTOM- Saba Business Association (SBA) a skibi un karta rabiá ku hopi keho pa direktor di MCB Bonaire i Derek Downes di Windward Island Bank (WIB). 

Resientemente a disidí ku tur kliente di Windward Island Bank, ku te asina leu tabata sirbi klientenan na St. Eustatius i Saba, lo bai kai awor bou di MCB Boneiru. Esaki, den un sentido ta lógiko, komo ku MCB Boneiru ta e úniko banko realmente establesé na islanan BES. 

Sinembargo e ehekushon ta bai hopi wantá. Tin negoshi ku asta despues di 10 dia despues di e traspaso, no por drenta den nan kuenta ònlain. Tambe tin kliente ku kuentanan eksistente, ku ta apliká pa internet banking, pero esakinan ta wòrdu rechasá, ku konsekuensia ku nan no por yega na nan sèn.

Credit Card

Tin tambe vários problema ku pagonan di Credit Card, ku klientenan a hasi den e dianan di e traspaso. Klientenan ku a paga tin nan kopia di e slep, pero e pago mes no a drenta serka e negoshi ku a duna e servisio òf a bende e produkto. 

Banda di esaki, MCB ta trata pagonan pa RBC na Saba, e úniko filial di banko na e isla komo pago pa eksterior, ku tur gastu adishonal ku esaki ta trese kuné. “Esaki, mientras ku RCB no ta kobrando pagonan ku tra drenta manera pagonan for di eksterior”, asina SBA ta reklamá. 

Si tur esaki ainda no ta sufisiente, tin tambe e probblema ku MCB ta kobra tur kliente pa gastunan bankario 6% di ABB, mientras ku ABB na St. Eustatius i Saba ta solamente 4% i no 6. 

Presidente di SBA, Alida Heilbron, ta pidi atenshon urgente di e bankonan i nan direktornan, pa solushoná e problemanan ku a konstatá. Segun Heilbron, hinter e kambio a bira uno ku por konsiderá komo sumamente frustrante.