KRALENDIJK- Siman pasá por a skucha di Bonaire International Airport (BIA) i Tourism Corporation Boneire (TCB) gaba kuantu turismo na Boneiru a krese den lunanan tras di lomba. De echo, aktualmente tin mas turista ku ta yegando nos isla, kompará ku e periodo promé ku pandemia di COVID-19 ku tabata aña 2019. 

Di su banda Entidat Públiko Boneiru (EPB) tambe ta buya kuantu sèn e impuesto nobo pa turista ta generando, ku ta laba den un par di shemil di dòler anualmente komo entrada pa EPB.

Pa tur hende ku ta tende tur e notisia di sifra positivo i entrada adishonal, ta hopi difísil pa komrpondé kon e tres aktornan prinsipal involví den nos turismo, por laga un situashon manera e kaminda di salida for di tereno di BIA laga eksistí, sin atendé ku esaki na un forman hopi mas lihé i proaktivo. 

Buraku

Tur hende ku ta hasi uso di e asina yamá Kiss & Ride lane, tur turista ku ta hür outo i asta e propio empleadonan di BIA tin ku pasa den e burakunan ku ta bia hundu dia pa dia, i ku ta pone sierto empleado asta teme pa kondishon di nan outo. Sinembargo, te asina leu gerensia di BIA ta parse inkapas di por atendé ku e asuntu aki. 

Mientras ku e direktor nobo Maarten van der Scheer tin su boka yen tokante invershonnan ku mester kondusí na un aeropuerto mas grandi na aña 2026, ta parse ku drechamentu un pida kaminda di apenas 50 meter -ounke sea di forma provishonal- ta muchu difísil.