KRALENDIJK- Riba djamars Salma Serberie a huramentá komo miembro di Konseho Insular di Boneiru pa frakshon Demokrat. E ta remplasá Delno Tromp, ku a renunsiá for di su puesto den e konseho insular.

E huramentashon a tuma lugá despues di e verifikashon di e dokumentonan nesesario, hasí pa e komishon establesí, ku a konfirmá ku a kumpli ku tur e rekisitonan nesesario pa huramentashon di Sra. Serberie den konseho insular.

Den su promé diskurso despues di e seremonia di huramentashon, sra. Salma Serberie a papia ku konvikshon tokante su responsabilidat pa sirbi Boneiru dignamente “Tin un dicho ta bisa bo por para pafó i reklamá i kritiká of bo ta djòin i yuda trese e kambio i ami skohe pa djòin i yuda trese kambio”, Serberie a bisa. Su palabranan ta reflehá su determinashon i kompromiso pa hunga un ròl aktivo den futuro di nos isla.

Bon biní

Miembronan di konseho insular ta yama Bon bini na Sra Salma Serberie i ta konfia den su kapasidatnan. Su eksperensia, kompromiso i pashon pa komunidat lo ta un adishon balioso na e trabou di Konseho Insular.