Kralendijk – Den 2021, STCB ta bai start ku un investigashon piloto di tres aña ku midimentu di temperatura di playanan i trahando perfil di e distribushon i densidat di e vegetashon na sitionan importante di pone webu na Boneiru. Ku e estudio akí, STCB lo kolektá datonan standarisá pa haña un bista mas amplio riba e efektonan di kambio di klima na sitionan di pone webu.

Temperaturanan di playa por afektá sobrebibensia di turtuga di laman, pa motibu ku e temperatura di inkubashon (esaki ta e temperatura den un nèshi durante e 50-60 dia di e periodo di inkubashon) tin un papel vital den determiná e sekso di e yu di turtuga. Por resumí e determinashon di e sekso serka turtuga di laman en breve komo ‘temperatura kayente pa muhé, temperatura friu pa machu’, ku e nifikashon ku temperatura di nèshi haltu ta kondusí na mas yu muhé. Konsekuentemente temperatura ku ta subi por kondusí pues na un skarsedat di turtuga machu den e populashon di turtuga di laman, afektando asina sobrebibensia di e espesie akí.

Un otro faktor di kambio di klima ku mester tene kuenta kuné ta e disponibilidat di espasio di traha nèshi. Playanan ta dinámiko pa naturalesa, pa e motibu akí e aparensia di un playa ta kambia di un aña pa e siguiente aña. Ora ku tin un balansa, e dinamismo akí no ta afektá e espasio disponibel pa sitio pa traha nèshi, solamente e ta kambia e distribushon di e nèshinan den sierto área. Sinembargo, eroshon, kresementu i distribushon di vegetashon por afektá e espasio ku ta disponibel pa traha nèshi i tambe e produktividat di nèshi. Pa tal motibu, STCB ta bai graba tambe e perfil di e playanan kaminda ta bai instalá aparato pa registrá temperatura.

Kolekshon di dato pa e proyekto piloto akí a start riba 19 di mei 2021 na e playa di register di Klein Bonaire ku instalashon di 40 aparato pa registrá dato. Playa Chikitu i e otro playanan na sùit di Boneiru lo sigui despues, komo ku ta bai instalá un total di 98 aparato pa registrá temperatura na Boneiru. E investigashon piloto akí ta un inisiativa di Inter-American Convention for the Protection and Conservation of Sea Turtles (IAC), un tratado internashonal ku Hulanda a firma i di kua STCB ta un miembro aktivo. Fondo pa e investigashon akí ta bini di WWF-NL.

---

Lesa tambe:

• 
  Fundashon Across The Isles ta bai kordiná  aktividat rondo di  historia di sklabitut na Boneiru
• 
  Tayer skibi buki pa mucha tokante herensia kultural, tabata un gran éksito
• 
  Fondo Nasional di Restorashon ta duna un fiansa pa restorashon di The Old Gin House na Sint-Eustatius
• 
  Kampaña nobo ‘You’ve got the power’ a ranka sali na Boneiru
• 
  Thuersten Winklaar ta bringa pa e título di Kampion Hulandes na Den Haag