KRALENDIJK – Durante un diskurso pa e konferensia di klima COP29 na Azerbedjan James Finies, presidente di Bonaire Human Rights Organization (BHRO), a trese dilanti ku e krísis di klima ku Boneiru ta hañ’é konfrontá kuné, segun su opinion tin su orígen den kolonialismo.

Finies a deklará ku Boneiru ainda ta bou di dominio kolonial, apesar di su státùs komo munisipio spesial di Hulanda. “No tin futuro berdè, blou òf oraño pa nos komo pueblo kolonisá dentro di nos teritorionan kolonisá.” Finies ta bisa.

Finies ta enfatisá ku e lucha pa hustisia klimatológiko mester bai pareu ku e lucha pa outonomia i libertat di kòntròl kolonial.

Finies ta sigui mustra ku ta tuma desishonnan tokante rekursonan i medio ambiente di Boneiru hopi biaha sin ku e komunidat lokal tin partisipashon. Ta p’esei ta sinti e konsekuensianan di kambio di klima, manera nivelnan di laman ku ta kresiente i wer ekstremo èkstra fuerte riba e isla.

Desaktivá 

Segun Finies por logra durabilidat di bèrdat solamente si desaktivá e sistemanan kolonial ku ta mantené eksplotashon i desigualdat. El a hasi un yamada pa rekonosementu internashonal pa Boneiru su derecho riba outodeterminashon i maneho di medio ambiente.