Kralendijk- Segun Cft, e propupuesto di Gobièrnu di Boneiru no ta kumpli ku eksigensia pa ku esaki. Esaki Cft a skibi den un karta fechá dia promé di sèptember.

Den nan karta Cft ta duna diferente motibu dikon, segun nan, e prosupuesto no ta bon. Na promé lugá Cft ke un mihó motivashon di e entradanan ku gobièrnu ta konta riba dje. Esaki ta kon spesífikamente pa entradanan for di turismo. Segun Cft ta skibi, no a substansiá e espektativanan aki sufisientemente.

Otro área di krítika ta ku ta konta ku e maneho di tereno ku kolegio ehekutivo ta proponiendo. Cft ta mustra riba e echo ku e maneho nobo aki no a keda ratifiká ainda den konseho insular i -pa e motibu ei- ta algu insigura ainda.

Cft ta mustra tambe riba e echo ku e prosupuesto pa 2022 ta mustra un défisit di 2 mion di dòler; algu ku no ta permití bou e lei di maneho finansiero BES (FinBes). Kolegio ehekutivo ta proponiendo pa kubri esaki for di un reserva finansiero ku gobièrnu di Boneiru tin. Cft ta di opinion ku esaki lo por ta permití, pero nan ke un miho motivashon di e prosupuesto den su totalidat, pa por aprobá e idea aki.

Maneho

Un otro punto di krítika, ku no ta nobo, ta e echo ku segun Cft e maneho finansiero di gobièrno mester mehorá. Ya den vários karta Cft a ekspresá esaki kaba, pero ainda no ta mira sufisiente mehorashon. Aña pasá gobièrnu a kontratá diferente eksperto pa yuda mehora e maneho finansiero, pero aparentemente no a logra sufisiente mehorashon ainda.