KRALENDIJK- Miebro di Konseho Insular, Daisy Coffee, ta denunsiá e echo ku parse ku tin poko seriedat ora ta trata asuntunan ku ta regardá pueblo de Konseho Insular.

Segun Coffie, tur hende ku ta sigui reunionnan den Konseho Insular òf ta tuma nota di esakinan via medionan sosial mester ta di akuerdo kun’é, ku e aktual gobernashon di UPB/MPB no ta atendé asuntunan di pueblo ku seriedat. “Ta malusá nan mayoria pa pasa tur loke nan ta kere i no ta tene kuenta ku loke kasi mitar di representashon di pueblo ta trese dilanti komo krítika konstruktivo i/o aporte di ideanan na interes di pueblo en general”, asina Coffie a bisa.  

Entre otro Coffie ta mustra riba e manera ku e prospuesto a keda tratá. “Tratamentu di presupuesto ku ta e dokumento mas importante di gobernashon di nos isla ta ser aprobá sin ku gobièrnu ta splika pakiko nan no a usa e fondonan ya aprobá ni tampoko ta splika dikon tin ku usa fondonan for di reserva pa bin ku proyektonan sin ningun splikashon i/o hustifikashon”, ainsa Coffie a bisa.

OVO

Coffie ta mustra tambe riba e echo ku den e último reunion por a konstatá ku no ménos ku 44 persona a keda tumá den servisio di gobièrnu riba e asina yamá OVO ku ta un kontrato di trabou speshal pa hasi sierto tareanan den e aparato. Ta konosí ku un hende riba OVO ta risibí tres biaha e montante na salario ku un empleado ku ser tumá den servisio di gobièrnu sea riba un kontrato pa tempu definí o sea den servisio permanente ta gana. “Pa kolmo no ta buska yunan di tera pa okupá e funshonnan aki, pero mas ku 90% ta Hulandes Oropeo”, asina Coffie ta remarká.

Biahe pa Hulanda

Coffie ta mustra ku djarason awor su frakshon tambe ta forma parti di e delegashon ku ta bai Hulanda. “Di mi banda mi ta bai ku dos mishon, esta konvensé Ministerio di VWS ku Boneiru mester tin dos laboratorio, opviamente ku kòntròl di akreditashon pa ku e nivel di servisio ku e ta duna”.

Coffie ta mustra ku su di dos mishon ta pa konvensé minister Carola Schouten i buskando den esaki sosten di miembronan di Tweede Kamer pa introdusí e mínimo sosial si ta posibel entrante 1 di yanüari 2023 i no warda te 2025. “Banda di esaki lo mi hasi esfuerso pa sostené diputado Nina den Heyer pa nos logra ku akohida di mucha lo bira kompletamente grátis”, asina Coffie a sigui splika.