Kralendijk – Frakshon Demokrat ta ekspresá disgusto i desaprobashon kompleto pa ku e trato preferensial, kontra lei i regla, ku Kolegio Ehekutivo ta duna Chogogo Beach & Resort den e proseso pa e resòrt haña e pèrmit ambiental ku nan falta pa traha un bich artifisial i habri nan portanan. Na mes momentu e Kolegio ta ofresé kondishonnan limitá na un empresario lokal pa bende pastechi riba Malekon. 

Ta inaseptabel pa Frakshon Demokrat ku Gezaghèber, despues di e reunion ku Chogogo Beach & Resort, a sigui mete su mes ku e asuntu aki i a duna òrdu na Stinapa i ambtenarnan di e direktorado ariba menshoná pa no para e konstrukshon i no duna e but, pues pa no kumpli ku e lei i regla vigente. Por a lesa tambe den medio di komunikashon ku gezaghèber, na nòmber di Kolegio Ehekutivo, a ordená e Direktorado di Planifikashon i Desaroyo oralmente pa sòru pa duna e resòrt e pèrmit ambiental mas rápido ku ta posibel pa asina nan por a habri promé di desèmber último. Komo ku e resòrt a entregá e petishon pa e pèrmit 17 di novèmber último, lo tabata imposibel pa nan risibí e pèrmit promé ku 1 di desèmber.

Problema fundamental

E Frakshon di Demokrat ta mustra tambe ku tin un diferencia hopi grandi entre e manera ku ta trata Chogogo, kompará ku e manera ku a trata un yu di tera. 

“Ta manera ku ta Kolegio Ehekutivo ta disidí pa ken sí i pa ken nò lei ta konta i ku esaki ta dependé di kuantu sèn un hende tin den su saku. Manera a pasa resientemente: un boneriano ta para kantu di awa bende su pastechi (Pastechi & More), un hende ta reklamá i mesora e direktorado di Mantenshon i Supervishon di Lei ta bai kit’é pa e para otro kaminda; aparentemente pasobra e ta un boneriano”, según e Frakshon korá

Segun PDB ta bisa, den kaso di e resòrt no ta kumpli ku lei i regla, tur hende ta reklamá i Gezaghèber ta duna òrdu pa laga nan sigui traha trankil. E diferensia ku tin ta esun ta un boneriano humilde ku ta traha pa e kome, e otro ta un mionario. E Frakshon ta bisa ku ta trata akgi di un problema fundamental, kaminda ta faboresé kapital grandi e estranhero, pero ta perhudiká hende lokal i humilde.