DEN HAAG – Gobièrnu Hulandes no a primintí ayudo finansiero pa solushoná e situashon den Blòk 1 di prisòn SDKK, sekretario di estado Alexandra van Huffelen ta bisa den un reakshon riba preguntanan di Curacao.nu 

Siman pasá Outoridatnan di Kòrsou mester a pone djes Benesolano den libertat pasobra nan enkarselamentu den prisòn SDKK tabata ilegal. Ku esei Kòrsou a violá derechonan humano.

Ayera minister di Hustisia Shalton Hato a bisa ku gobièrnu Hulandes ta na altura di e situashon i e veredikto i ku ta p’esei a primintí Kòrsou pa brinda ayudo finansiero.

Na 2019 Hulanda a pone dos mion euro disponibel despues di un petishon di Kòrsou pa ayudo i asistensia pa ampliashon i optimalisashon di detenshon temporal di estranhero riba tereno di SDKK.

“E sèn ei tabata destiná pa konstrukshon, pero tambe pa drecha e situashonnan interno. Pa asina e detenshon kumpli ku obligashonnan internashonal pa loke ta trata derechonan humano”, señora Van Huffelen ta bisa.

Apesar di e progreso di konstrukshon di un edifisio nobo pa detenshon temporal di estranhero  i asistí na módulonan di formashon pa personal tokante trato ku ta duna estranheronan, tin otro asuntunan kaminda,  segun Hulanda, Kòrsou a keda atras. 

“Ta trata asuntunan manera asistensia hurídiko, kuido médiko i un programa di dia adekuá”, segun e sekretario di estado. Pa e motibu ei a para e ayudo fin di aña pasá. “Nos ta kòmbersando si ku otro, pero no a reanudá e asistensia”, señora Van Huffelen ta sigui bisa.