DEN HAAG – Sekretario di estado Alexandra van Huffelen ta bisa di ta lamentá ku Gabinete Rutte a kai, pero ku e tin intension pa sigui traha riba loke e ta deskribí komo failnan relashoná ku parti Karibense di Reino.

“E Gabineta a kai. Lástimamente, nos no a por superá e diferensianan supstansial e siman aki. I esaki ta sumamente amargo! No den di último lugá pa e habitantenan di e islanan Karibense i e retonan digital ku mi tabata trahando ariba huntu ku tur kolega,” asina Van Huffelen a bisa.

E sekretario di estado demisionario, riba su página di LinkedIn ta bisa di ta mira bèk ku satisfakshon riba tur loke a logra pa parti Karibense di Reino den e último 1,5 aña.

“Pero e trabou ainda no a kaba. Mi kier – tambe den un gabinete demisionario – yuda adelantá hopi dosier. Pasobra e habitantenan di parti Karibense di Reino i e retonan pa inkluí tur hende den e mundo digital i hasi esaki seif i sigur, nan no tin tempu pa warda,” Van Huffelen a bisa.

Apresio

Aunque hopi habitante di Hulanda Karibense na promé no tabata sa kiko nan mester spera di Alexandra van Huffelen, despues di un aña i mei, nan ta mustra hopi apresio pa e sekretario di estado demisionario. Vários dosier bou di liderazgo di e secretario di estado di D66 a yega di progresá hopi mas rápido kompará ku esun anterior, Raymond Knops (CDA). Tambe a nota ku Van Huffelen hopi biaha tabata buskando diálogo ku habitantenan di e islanan di forma aktivo, i nan no tabata tin miedo pa pone su mes den situashonnan kaminda e tabata algu vulnerabel.

Baile spòntáneo

Un baile spòntáneo ku Primer Minister Gilmar Pisas di Kòrsou, den kua Van Huffelen a demonstrá ku nan e no tin e mesun heupnan ‘steif’ di hopi Europeanuo a genera hopi apresio di hopi hende bibá riba e islandan di Karibe Hulandes. A pesar di su popularidat riba e islanan antiyano, prensa Hulandes hopi biaha tabata astante negativo pa loke ta trata Van Huffelen.