KRALENDIJK- Djaweps mèrdia, Maarten van Ooijen, Sekretario di estado di e ministerio di Salubridat Públiko, Bienestar i Deporte (VWS), a papia ku prensa den kuadro di su bishita na Boneiru.  

“Pa promé mi a bishita Boneiru. Mi a mira hopi i a papia ku hopi hende. Mi a bai Sentro Akseso, hospital, kas di kuido, ZW Ggroep i algun mas. Hopi impreshonante loke mi a mira, di e trabounan ku a keda ehersé”, asina Van Ooijen a bisa. 

Apresio 

E sekretario di estado a bisa ku ela haña un bon impreshon, kon e organisashonnan ta traha. Entre otro Van Ooijen a ekspresá apresio ku ela mira na Akseso, pero tambe na Hospital. Tambe Van Ooijen ta kontentu di loke ela mira di e manera ku ta kuida hendenan grandi den e bario di Rincon.

Van Ooijen a sigurá esnan presente ku unabes bèk na Hulanda, ta su intenshon pa sigui traha pa e islanan.