WILLEMSTAD – Asosiashon di Sektor Empresarial na Kòrsou, VBC, ke separá e diskushon riba florin Karibense for di dolarisashon. Dos asuntu diferente, segun e empresarionan.

VBC ta mira e florin Karibense solamente manera un kambio simpel di nòmber, ku riba su mes no mester tin konsekuensia pa e balor di e florin òf e ekonomia Kurasoleño.

Banko Sentral a splika den detaye kiko mester pasa pa kambia e florin Antiano pa e florin Karibense. Sin drenta den tur detaye tékniko tin motibunan bálido i hopi importante pakiko e kambio mester sosodé riba término korto. 

Banko Sentral mester pèrkurá pa tene sufisiente plaka kèsh den sirkulashon pa por kumpli ku tur transakshon, spesialmente pa e motibu ku hopi transakshon na Kòrsou ta sosodé ku plaka kèsh. Téknikamente e moneda bieu no ta kumpli mas ku e eksigensianan di kalidat i seguridat di awendia.

Un diskushon ámplio tokante di e florin a pasa pa un segundo plano, pasobra a tuma e dekreto gubernamental pa basta tempu kaba, e empresarionan ta bisa.