KRALENDIJK – Kontrali na hopi aña e aña aki por nota konsiderablemente mas atenshon pa selebrashon di e Dia di Boneiru. Djaluna gobièrnu a saka un programa ku por konsiderá komo ekstenso.

Pa kuminsá kalentá pa Dia di Boneiru, riba djaweps 5 di sèptèmber tin un antesala for di 6:00 or di atardi te 12:00 or di anochi riba e lugá di stashoná outo di e edifisio prinsipal di gobernashon, den Parke Wilhelmina i riba Oranjeplein. Durante e anochi akí tin un programa ku diferente grupo di músika krioyo. Riba e mesun anochi, Ofisina di Turismo di Boneiru ta organisá un otro edishon di Nochi di Kompra, kaminda pakus ta keda habrí mas lat. Tur e stèntnan di Dia di Boneiru tambe lo forma parti di evento, i nan lo ofresé kuminda, kos di bebe, arte i mas pa krea un ambiente festivo. E anochi ta kulminá ku un show grandioso di vürwèrk 12:00 or.

Dia 6 di sèptèmber e programa ofisial ta kuminsá 7:30 or di mainta ku un seshon solèm i diskurso di parti di lidernan di frakshon i presidente. Despues lo tin un seremonia ofisial ku ta dura te 12:00 or di mèrdia. E programa akí ta pone énfasis riba importansia di nos komunidat i nos isla i e ta konsistí di seremonia di hisa bandera, músika i rekonosementu di nos suidadanonan di honor. Ora ku e parti ofisial kaba, e programa kultural ta kuminsá 12:00 or di mèrdia den Parke Wilhelmina ku aktividat manera músika di parti di DJ, stènt ku kuminda i arte, grupo di baile i presentashon di talentonan lokal. Lo tin tambe entretenamentu di vários  banda ku ta toka músika krioyo, salsa, bachata, reggae i mas.

Programa kompletu

Pa mas informashon i aktualisashon tokante e programa, bishitá e wèpsait di gobièrnu www.bonairegov.com.