WILLEMSTAD – Jacqueline Hamilton ta rekuperá satisfaktoriamente. Riba 11 di ougùstùs tres pitbull a atak’é den e bario di Jongbloed, mientras e tabata kanando ta bai su trabou.

E kachonan a atak’é, bash’é abou i a mord’é rònt su kurpa. E tabatin leshonnan serio na su man- i pianan, su kurpa i kara. Ora ambulans a yega, e señora tabata grita di doló.

For di investigashon di polis na e sitio a bin sali na kla ku e víktima tabata kana riba kaminda den e kaya menshoná ora ku diripiente e kachónan a sali for di un ket ku no tabata será i a atak’é.

Opservashon

Ounke e ta bon konsiderando e sirkunstansianan, e ta den hospital ainda. Ta nesesario pa sigui hasi opservashon. No opstante ku su rekuperashon ta sigui satisfaktoriamente i ku te ku awor tur kos ta bai bon, segun e matutino Èxtra.

Señora Hamilton ta agradesido pa tur atenshon i sosten ku el a haña di komunidat den e kaso aki i ta spera ku pronto e lo por ta na kas bèk.

E doño di e kachónan tambe a haña mordé. A mata e tres pitbullnan inmediatamente.