BRUSSEL – Un señora Hulandes ku ta biba na Bélgika ta bai haña probablemente tres aña di kastigu di prisòn pasobra e kier a pasa mas ku mei kilo di kokaina di kontrabanda for di Kòrsou.

Dia 9 di sèptèmber e señora a yega aeropuerto di Bruselas ku un buelo for di Kòrsou, pero na momentu di kòntròl di duana a resultá ku e tabatin 550 gram kuné skondí den su kurpa. Segun e señora el a organisá e transporte riba propio inisiativa.

“Via via mi a tende ku na Kòrsou bo mester bai un sierto plenchi i por papia ei ku un hende ku por entregábo droga”, e señora ta bisa. “Mi tabatin problema finansiero i a bende algun prenda pa por a paga e biahe pa Kòrsou. Ku e sèn di e droga mi a spera di por a kaba paga mi debenan.”

Ministerio Públiko Halle-Vilvoorde na Bélgika no a kere henter e storia i tabata di opinion ku e señora definitivamente a aktua bou di enkargo di un organisashon kriminal. Ministerio Públiko a eksihí un kastigu di prizòn di 36 luna pa e señora. 

Bar bankarota

“Mi ta komprondé ku Ministerio Públiko ta duda den e storia, pero den e investigashon no a haña nigun indikashon di un promotor”, e abogado, ku ta pleita e kaso di e señora, ta bisa. “Mi kliente tabatin un bar pa hopi aña, kaminda desafortunadamente tabatin kliente ku ta usa droga. E sa pues serka ken e mester ta pa semehante pregunta. Pa motibu di e pandemia di corona su bar a bai bankarota, i e pakus ku el a habri despues a sera pa motibu di un lèkmentu di awa. El a spera di por a bende e kokaina aki pa 10.000 euro pa sali for di su debe.”

Segun e abogado e señora a realisá ku e tabata fout i ta buskando awor trabou legal. Defensa pues a pidi un kastigu di trabou. Ta dikta sentensia dia 31 di yanüari.