WILLEMSTAD – Kòrsou mester rekonosé adikshon na wega di plaka komo un trastorno sikiátriko, ya asina por duna kuido adekuá i SVB por kubri e tratamentu via e pakete di kuido básiko.

Esei Konseho Sosial Ekonómiko (SER) ta skirbi den un konseho komo konsekuensia di proyektonan di lei di  gobièrnu pa reformá e sektor di loteria di Wega di Number.

Un reforma mas aleu di e eksigensianan pa pèrmit na fabor di prevenshon di adikshon ta kontribuí na redusí e problemátika di adikshon di wega di plaka riba e isla i na promové aktividat empresarial sosial responsabel di e sektor di loteria.

Frekuente

Adikshon na wega di plaka ta un fenómeno frekuente riba e isla, pero no tin informashon aktual disponibel kon agudo esaki ta. E último investigashon ta data di aña 2003.

Formalmente ta rekonosé adikshon na wega di plaka komo un trastorno sikiátriko, pero komo ku esei no ta e kaso na Kòrsou e no ta aparesé tampoko den e pakete básiko di kuido di SVB.

A base di e resultadonan di e investigashon di 2003 SER ta konkluí ku e problemátika di wega di plaka ta relativamente ámplio na Kòrsou. Konsekuentemente un maneho efisiente ku ta dirigí riba prevenshon i eradikashon di adikshon di wega di plaka ta hopi nesesario.

SER ta konsehá gobièrnu pa konsiderá  inkorporashon di  responsabilidat di sektor di Wega di Number, pa loke ta trata prevenshon di adikshon, den e kondishonnan pa pèrmit. 

E sektor di loteria na Kòrsou ta konta na e momentu aki ku 24 doño di pèrmit, ku huntu ta generá un entrada anual di 62.4 mion florin.