WILLEMSTAD – Konseho Sosial Ekonómiko (SER) ke sa kiko ta e impakto di imigrashon riba ekonomia di Kòrsou i e efekto riba finansas di gobièrnu.

Pa esaki ta bai efektuá un sondeo i e ta un kontinuashon riba un simposio ku e SERnan di Aruba, Kòrsou i Sint Maarten a tene huntu na 2019 ku e tema Migrashon, Desaroyo Sosial Ekonómiko i Retonan di Maneho. 

SER ke sa tambe kon e maneho ta pa integrá mas tantu posibel trahadónan  estranhero den e merkado laboral di Kòrsou. E inisiativa aki ta pas den e intento pa aktualisá i modernisá e maneho di merkado laboral konforme e Landspakket? I si ta asina, kon esei ta relashoná ku e meta stratégiko di kabinete pa alsa e partisipashon di trabou di Yunan di Kòrsou durante e periodo di gobernashon aki?

Anteriormente kolegio di konseho a publiká un sondeo tokante futuro di AOV den relashon ku migrashon i un sondeo tokante kontribushon di e populashon di migrantenan na desaroyo sosial ekonómiko di Kòrsou.

E pregunta sentral pa SER ta si por usa e kapasidat di trabou ku ta disponibel riba merkado di Kòrsou i ku no ta trahando awor aki, adekuá i efektivo. Segun e Konseho desempleo na Kòrsou ta inaseptabel haltu, kasi binti porshento i spesialmente bou di hóbennan aun mas haltu ku kuarenta porshento. Ku kua kondishonnan nan mester kumpli pa haña nan na trabou? Reedukashon, kontinuashon di formashon profeshonal ta nesesario?

SER no sa ainda ki dia ta start ku e sondeo. SER ke tin garantia ku un sondeo di un órgano di konseho di gobièrnu i Parlamentu por duna un kontribushon real. Spesialmente pa realisá e metanan manera tin poné den e programa di gobernashon 2022-2025 di e kabinete aktual.