WILLEMSTAD – Pagadónan di impuesto na Kòrsou tin posibilidat te fin di e luna aki pa drenta un areglo di pago ku Servisio di Impuesto pa debenan ku ta habrí.

Asina’ki nan por prevení ku ta kobra kasi shete porshento di interes riba kobransa di e debenan aki. For di 1 di aprel Servisio di Impuesto ta kobra e interes aki. Tantu personanan individual komo komersiantenan por hasi uzo di e areglo aki.

Si nan tene nan mes na e kondishonnan di e areglo di pago, lo no kobra interes di kobransa. Pero si nan no tene nan mes na e kondishonnan, lo kobra interes di kobransa ku forsa retroaktivo di e montante ku a keda habrí ainda.

A introdusí e areglo di transishon pa no hinka pagadónan di impuesto inesesariamente den gastu. No ta nesesario pa gran parti di nan pa bini Servisio di Impuesto na WTC. Por entregá un petishon pa e karchi di debedó òf un petishon pa un areglo di pago serka servisio di impuesto via meil.

Servisio di Impuesto ta enfatisá ku despues di 1 di yüli lo kobra interes di kobransa den tur kaso. Esaki ta konta tambe na momentu ku a sera un areglo di pago despues di e fecha aki.