WILLEMSTAD – Servisio di impuesto a kolektá kasi 566 mion florin den e promé kuartal di e aña aki. Kasi djesun mion florin mas ku den e promé kuartal di aña pasá. Asina Servisio di impuesto ta informá.

Esaki no ta motibu pa kanta haleluya i esei ta pasobra e entrada èkstra ta prinsipalmente konsekuensia di mas entrada di prima. Sèn ku no por uza pa maneho. Ta trata di total kasi 204 mion florin, mas ku djestres mion florin mas ku aña pasá. Na final di kuenta a drenta pues ménos sèn di impuesto.

Impuesto di ganashi a generá den e promé kuartal ménos ku aña pasá, kasi djessinku mion florin. Impuesto di bienes inmóbil tambe a generá ménos, kasi shete mion florin. Pero esei ta debí na e proseso di rekuperashon aña pasá i e balotashonnan ku no a sali ainda e aña aki.

Pa awor akí e entradanan mas haltu di impuesto di suèldu i impuesto di entrada ta revoká e skarsedat.